15
Migkaǥi si Elifaz
Ne zutun midtavak si Elifaz he tig-Teman te, “Job, is metau he etew kenà egkaǥi te wazè din pulus. Emun ebpekidlalis ne kenè din egemiten is tinulebung he menge lalag. Piru is ebpengeǥiyen nu ne ebpekesuǥù te etew te kenà kedtahud wey kenà kebpenilbi te Megbevayà. Is ebpengeǥiyen nu veǥas te kegkezaat nu. Ne edlimbungan nu is duma pinaaǥi te menge lalag nu. Kenè en kinahanglan he edhukuman ku sikew su is ebpengeǥiyen nu, iyan en ebpengumbenar he nesayep ka. Mid-isip nu ve he iyan ka nehuna he neetew? Neetew ke en be hein wazè pa limbaǥa is menge vuntud? Nezineg nu en be is menge pelanu te Megbevayà? Iyan ke zè be etew he metau? Hengkey is netuenan nu he wazè dey metueni? Hengkey is nesavut nu he wazè dey zaan mesavut? 10 Nekeistudyu key ziyà te menge etew he memeǥurang en, edhuna pa he meǥurang te amey nu! 11 Migkeǥiyan dey sikew te menge lalag he ebpuun diyà te Megbevayà he ebpekezasig wey ebpekelipey kenikew. Kurang pe be heini? 12 Maan is mibpeuwit ka te egkeǥezam nu? Hengkey is nekepelakap kenikew he iyan kenè nu igketueni te tutuu, 13 umbe utew nu nepeuki is Megbevayà ne nekaǥi nu heeyan is mezaat he menge lalag he ebpekesuǥat kandin? 14 Egkehimu ve te etew is kebpengungubpaan he tutuu lumpiyu wey metazeng? 15 Wazà ganì medsarig is Megbevayà te menge velinsuǥuen din! Emun kenà lumpiyu is ked-ahaa zin kayi te menge ilengiten he menge linimbag, 16 iyan pe be is etew he neetew he mezaat wey mekesesalà, he igkemezahi zin is kebaal te mezaat?
17 “Job, pemineǥa a kenikew. Egkeǥiyen ku wey ibpahayag ku ziyà te kenikew is neseǥazan ku. 18 Egkekaǥi zaan heini te uluwanen he menge etew he nekeistudyu ziyà te menge lukes dan. 19 Utew sikandan uluwanen, su iyan dà sikandan nekaangken te menge tanè dan, ne wazà sikandan sekupa te menge lumelengyawà.
20 “Is lalung he etew duen din elentusen seled te tivuuk he untung din. 21 Layun sikandin egkulbai. Minsan timpu he wazà kezeetan, egkulbaan sikandin su kela ke surunga te menge tulisan. 22 Egkahandek sikandin su netuenan din he kenè din egkelikayan is kemetayen. 23 Ebpekeriǥuriǥu sikandin diyà te minsan hendei is ebpen-ahà te keenen. Netuenan din he hapit en sikandin ebpatey. 24 Utew subra is kulbè din su iring sikandin te hadì he edsurung te kebpekidtebek. 25 Egkehitavù heini ziyà te kandin su ǥeina te midribildiyan din is Megbevayà he Mekeǥeǥehem wey midsukulan din. 26 Henduen be te migawed sikandin te melig-en he kelasag he andam en he edsukul te Megbevayà. 27 Minsan sepian sikandin wey melambù ǥuntaan, 28 ebpekeubpà sikandin diyà te menge valey he wazà duen ed-ubpà he henduen te egkerundus en, he ziyà te nezeetan he menge inged. 29 Kenè en sikandin ebpedayun he edsepian. Meǥaan dà egkaawà diyà te kandin is ketiǥeyunan din, ne is menge azen din kenà ebmahabet kayi te tanà. 30 Kenà sikandin ebpekelikey te kezeetan. Egkeiring sikandin te kayu he egketutung is menge seringsing din. Ne sengehiyup dà te Megbevayà ne egkahanew is langun he azen din. 31 Deyzey ke kenè din edlimbungan is keugelingen din pinaaǥi te kedsarig te menge vutang he wazè din pulus, su wazè din egkekuwa puun kayi. 32 Iring sikandin te kayu he egkeǥangu te kenè pa timpu te kebpemeǥas su zaan din en egkezawat is silut kandin ne kenè en sikandin ed-uswag. 33 Egkeiring sikandin te paras he nepugpug is mehilew he menge veǥas din, wey iring te kayu he ulibu he nerapì is kevukazan din. 34 Is kenà edsunud te Megbevayà ne ebpematey he wazè dan menge kevuwazan. Egkengevinsulan is menge valey he mibangun dan pinaaǥi te kebpenapì dan. 35 Layun dan ed-isip te kedsinamuk, kebaal te mezaat, wey kebpenlimbung.”