1 Ne midtavak si Job te, 2 “Neuǥet ku en heeyan he nezineg. Edlipayen e man pezem keniyu piru nasì niw umani is kegkeseeng ku. 3 Kenè kew en be ed-engked he egkaǥi te wazè din pulus? Hengkey ves is nekesamuk te isip niw maan is edtulung kew ebpekidlalis kedì? 4 Emun iyan kew kayi te kediey he kebpekesavuk guntaan, egkehimu ke egkaǥi a zaan te iring te ebpengeǥiyen niw kayi te kedì. Utew ku ebeghetà is kedlalag ku keniyu ne ebpengelkelengan ku sikiyu. 5 Piru kenè ku heeyan ebeelan. Kekenà, egkaǥi a te menge lalag he ebpekezasig wey ebpekelipey keniyu. 6 Piru ǥuntaan, kenà egkaawà is kegkesekiti ku minsan hengkey is egkeǥiyen ku. Ne emun daan ebpereremek a ne kenà gihapun heini egkaawà.

7 “He Megbevayà, mibeley a kenikew. Midezeetan nu is tivuuk he pemilya ku. 8 Impeǥasà a kenikew; utew grabi is daru ku, umbe iyan isip te zuma is tuus heini he nekesalà a. 9 Tenged te pauk nu, Megbevayà, midsurung a kenikew. Henduen ka te zumezaas he langgam he mibpitaspitas te sapù ku. Mibpekiǥetan a kenikew te menge ngipen nu wey mibpemusiǥahan a kenikew he henduen te kuntada a kenikew.

10 “Edsusudien a wey ed-eengitan a te menge etew. Midtabpì dan is buked ku te kedsudì kedì. Midlivangan e zan te edsurung. 11 Imbeǥey a te Megbevayà diyà te menge lalung wey mekesesalà he menge etew. 12 Meupiya is kebpekesavuk ku zutun te nehuna he timpu, piru midezeetan e zin. Henduen be te mibpekel e zin wey midruntek. Midsinuǥat e zin. 13 Midliǥuyan a te menge perepanè din, ne wazà e zan urami te ebpanà. Netiyuk a ne midtiǥis is epezu ku ziyà te tanà. 14 Ne kenè e zin ed-engkezan te ebpalì. Henduen sikandin te sundaru is midsurung kedì. 15 Mibivisti a te saku wey mibpinuu a ziyà te tanà is egkeseeng. 16 Mibmeriǥà is kedezagwey ku wey nenlevag is menge mata ku tenged te kebpeketulung ku kebpekesineǥew. 17 Wazà neveelan ku he salà, wey tinutuuwà is ked-ampù ku.

18 “Iring a te etew he midhimetayan he edhangyù diyà te tanà he kenà bumbuni is lengesa zin su wey pinaaǥi zutun ikeveǥey kandin is kukuman he kenà sikandin egkevintahaan. 19 Minsan guntaan, diyà te langit is tistiǥus ku. Ne iyan sikandin egkaǥi he wazè ku salà. 20 Edsudien a te menge emiǥu ku, piru midsineǥew a wey mid-ampù a ziyà te Megbevayà is ebuyù te tavang. 21 Angin pezem ke zuen ebpehizuhizu ziyà te Megbevayà para kediey iring te kebpehizuhizu te etew para te emiǥu zin. 22 Su kenè en egkeuǥet ne egenat ad ne kenà ad edliku.”