29
Is menge Tuvad he Nezawat ni Job te Nehuna he Timpu
1 Ne impelaus ni Job is menge lalag din,
2 “Angin pezem ke edlikù is nenlavey he menge andew he zutun ebentayan e pa te Megbevayà,
3 hein edteyawan din pa is ibayè ku zutun te kedhipanew ku ziyà te merusirem.
4 Dutun te timpu he meupiya pa is kebpekesavuk ku, iyan is Megbevayà utew ku emiǥu, ne edtuvazan din is pemilya ku.
5 Dutun he timpu ebpekiduma pa kedì is Mekeǥeǥehem he Megbevayà, wey zuma ku pa is menge anak ku.
6 Dutun he timpu is menge vaka ku nekeveǥey te utew zekelà he ǥatas, is menge ulibu ku nekeveǥey te utew zekelà he lana.
7 Emun edhendiyà a te pultahan te inged su edtampu a te ebpemendumala te inged dutun te kebmiting dan,
8 ebpekilid is betan-en he menge maama emun egkeehè e zan ne ebpemenhitindeg is menge meǥurang te kedtahud kedì.
9 Ebpereremek minsan is menge pengulu
10 wey dungganen he menge etew emun egkeehè e zan.
11 Is minsan hentei he nekaahà etawa nekezineg kedì he egkaǥi, edalig kedì.
12 Su edtevangan ku is menge pubri he mibpetavang kedì wey is menge ilu he wazà ebpeketavang kandan.
13 Ebpenubtuvazan a te edserupatey he menge etew he netevangan ku, wey nelipey is balu he menge vahi he netevangan ku zaan.
14 Layun ku edhimuwa is metazeng wey hustu; iring heini te visti wey tengkulu he idselu-ub ku.
15 Nehimu a he mata te etew he nelakap wey paa te etew he nepigket.
16 Nehimu a he amey te menge pubri; minsan is menge lumelengyawà, midtevangan ku te menge kasu zan.
17 In-awè ku is gehem te lalung he menge etew ne midlibri ku is menge mibiktima zan.
18 “Mid-isip ku he ebmeluǥayad is untung ku ne emun ebpatey ad egkeliǥuyan a te pemilya ku.
19 Wey mid-isip ku he egkeiring a te melig-en he kayu he nendalid diyà te wahig he layun egkezehemuǥi is menge subpang din.
20 Layun a edeliǥa te menge etew wey layun a melig-en.
21 Emun ebeǥey a te sambag ebpereremek is menge etew su ebpurung dan ebpemineg.
22 Emun ebpekepasad a he egkaǥi ne wazè dan en igkeuman su ereg en kandan is mibpengaǥi ku.
23 Ebpengenduyen dan is menge lalag ku iring te kebpengenduya zan te uzan. Utew zan heini egkesuati te ebpemineg.
24 Henduen be te kenè dan ebpeketuu emun egemenan ku sikandan; is melipayen he kedezagwey ku ebpekezasig kandan.
25 Ne iring a te pengulu su ebpenuruen ku sikandan te ereg he ebeelan dan. Ebpenguluwan ku sikandan te iring te kebpengulu te hadì te menge sundaru. Edlipayen ku sikandan emun egkeseeng dan.