1 “Iyan, guntaan edsudien a te menge etew he menge vetan-en pa kedì, he kenà egkeseriǥan is menge amey zan. Egkeseriǥan pa is menge asu ku he vantey te menge kerehidu ku. 2 Hengkey is egkekuwa ku puun kayi te menge etew he memeluya wey egkeveley? 3 Utew sikandan memeǥasà tenged te kewewezai wey kegkevitil zan. Ebpengamuy-amuy zà sikandan te egkekaan dan diyà te sibsivayan minsan mezukilem en. 4 Ebpemezuten dan wey egkeenen dan is ebpenuvù diyà te sibsivayan, minsan is meladsem he zalid te kayu he inibru. 5 Edsegseǥen sikandan pehendiyà te meziyù te menge emurè dan te inged, ne egkulehien sikandan he henduen be te menge tekawen. 6 Diyè dan dà ed-ubpà te menge zal-ug, diyà te vudsi te menge vatu, wey ziyà te menge vudsi te tanà. 7 Henduen sikandan te menge langgam he edtaul ziyà te ketelunan, ne edhahasekhasek sikandan diyà te lempek te zezeisey he kayu. 8 Wazè dan pulus wey wazà nekekilala kandan, ne midsegseg sikandan puun te tanè dan.

9 “Ne ǥuntaan edsudien a te menge anak dan pinaaǥi te kanta. Nehimu a he egkeengitan para kandan. 10 Igkelimezangi e zan wey edlikayan e zan. Ne kenè dan en egkenawànawà is ed-ileb te vuked ku. 11 Guntaan te ebpeluyahan a wey edresayen a te Megbevayà, ebeelan dan en is egkesuatan dan te ebaal kayi te kediey. 12 Edsurungen a kayi te wazà pulus he menge etew. Midlitaǥan dan is ebeyaan ku, wey edtinguhè dan te kedezaat kedì. 13 Ebelevaǥan dan is beyeey ku te kedezaat kedì. Mibmezeeǥen dan minsan wazà midtavang kandan. 14 Edsurungen e zan, iring dan te menge sundaru he ziyà mebayà te meluag he vudsi te migevà he verengbeng. 15 Utew subra is kegkahandek ku, wey naawà is dengeg ku wey ketiǥeyunan ku he iring te ǥapun he inlayap te mevandes he keramag. 16 Ne ǥuntaan henduen be te ebpatey ad; kenà egkeengked is kegkerasey ku. 17 Emun mezukilem ne ed-al-al is menge tulan ku; is mesakit he egkeǥezam ku kenà egkeengked. 18 Pinaaǥi te zesen te Megbevayà, mibpekel e zin. Migewezan din is lieg te kumbalè ku 19 ne intimbag e zin diyà te vasak. Ne neiring a te eliyavuk wey avu.

20 “Nengumew-umew a kenikew, Megbevayà, piru wazè ka medtavak. Midhitindeg a ziyà te etuvangan nu, piru wazà a kenikew seǥipaa. 21 Nehimu ka he mesipala kediey. Migamit nu is dekelà he ǥehem nu te kedrasey kedì. 22 Henduen be te ibpelayap a kenikew te keramag wey ibpevelvelikid a kenikew te vagyu. 23 Netuenan ku he ed-uwiten a kenikew ziyà te lugar te menge minatey, ziyà te lugar he inteǥana nu he egkepeveyaan te langun he etew.

24 “Wazà etew he mibpesipelahan ku he zuen din elentusen wey ebpehizuhizu tenged te kelised. 25 Ebpekesineǥew a ganì emun duen etew he edlised. Utew ku igkehizu is menge pubri. 26 Piru te kebperateng ku he meupiya is ebeelan kayi te kediey, mezaat hinuun is mibeelan kayi te kedì. Ebpen-ahà a te merayag piru kerusireman is nekeuma kayi te kedì. 27 Kenè en egkeengked is kesakit te ǥehinawa ku. Andew-andew is kebpekesaǥad ku te elentusen. 28 Mibmeitem is lundis ku kenà tenged te keinit te andew, kekenà, tenged te zaru. Midhitindeg a ziyà te kezekelan su ebpetavang a. 29 Is laǥeng ku henduen be te taul te leew he asu wey kegkaǥi te ekang. 30 Mibmeitem is lundis ku wey egkengepadpad is keǥang ku. Ne utew metikang is dateng ku. 31 Nehimu he mekeseseeng is daǥing te alpa ku wey pulalè ku.”