22
Is Silut te Nengazen te menge Hadì diyà te Juda
1 Migkeǥiyan a te Nengazen te, “Hendiyè ka te turuǥan te hadì te Juda ne keǥiya nu heini he menge lalag:
2 ‘He hadì te Juda, he kevuwazan ni David, pemineǥa nu heini is menge lalag te Nengazen. Ipepemineg nu is menge upisyal nu wey is menge etew nu he kayi ebayà te menge ǥemawan te turuǥan.
3 Migkaǥi is Nengazen te: Baal kew te hustu wey metazeng. Tevangi niw is menge mibpenekawan; libriya niw sikandan puun te gehem te midrasey kandan. Kenè niw dèdaaǥa wey pesipelahi is kenà menge Israilihanen, is menge ilu, wey is menge valu. Kenè kew zaan himatey te wazà mekesalà.
4 Su emun edtumanen niw heini he menge suǥù, ne layun duen egkahadì kayi te Jerusalem he kevuwazan ni David. Ed-untud is hadì te menge kerwahi wey menge kudà, ne ebparid pinaaǥi te kedselang te menge pultahan kayi te turuǥan, duma te menge upisyal wey menge etew zin.
5 Piru emun kenè niw edtumanen heini he menge suǥù, ne ibpenangdù ku he egkezeetan heini he turuǥan, ne siak is Nengazen, egkeǥiyen ku keniyu he kenà egkehimu he kenà heini egketuman.’ ”
6 Iyan heini migkaǥi te Nengazen bahin duen te turuǥan te hadì te Juda:
“Diyà te kediey iring is kekempet kayi te kekempet te Gilead etawa puntur te vuntud he Lebanon. Piru siguradu he edhimuwen ku heini he disirtu, iring te inged he wazà duen ed-ubpà
7 Duen menge etew he edsuǥuen ku te kedrundus kayi he turuǥan. Is kada sevaha kandan duen din gelemiten he para te idtamped te menge pinilì nu he tukud he sidru, ne idrapug dan heini.
8 Is menge etew he ebpemuun diyà te nekedseselekawà he menge nasyun he edsaǥad kayi he inged ebpein-inseey te, ‘Maan buwa is mibeelan heini te Nengazen kayi te nevantug he inged?’
9 Ne is tavak iyan heini, ‘Tenged te inselikwey zan is kebpekid-uyun te Nengazen he Megbevayè dan, ne mid-azap wey nenilbi sikandan te zuma he menge ed-ezapen.’ ”
Is Lalag Mehitenged ki Jehoahaz
10-11 Sikiyu is menge etew ziyà te Juda, kenè niw sineǥawi si Hadì Josia is minatey en, kekenà, iyan niw purungi sineǥawi is anak din he si Jehoahaz he mid-ilis kandin te kedhadì diyà te Juda, su mibihag sikandin ne kenè en ebpekelikù diyà te tanà he mid-enakan kandin. Su migkaǥi is Nengazen te, “Kenè en sikandin ebpekelikù.
12 Ebpatey sikandin diyà te inged he zutun sikandin bihaǥa. Kenè din en egkeuman egkaahà heini he tanà.”
Is Lalag Mehitenged ki Jehoyakim
13 Mekehizuhizu ka, Hadì Jehoyakim, is mibpevangun te turuǥan nu pinaaǥi te kenà metazeng he paaǥi. Impeterebahu nu is iring nu he etew he wazè nu veyazi.
14 Migkaǥi ke pa te, “Ebangun a te turuǥan he zuen din meluag he menge ruǥu diyà te zivavew. Ebpeveelan ku heini te meluag he menge sulawà ne ebpeelevetan ku te kisami he sidru, ne ebpepintalan ku te meriǥà.”
15 Egkeisip nu ve is egkehimu ka he ventuǥan he hadì emun ebpekepehitindeg ka te turuǥan he sidru? Maan is kenè nu edsunuzen is amey nu? Hustu wey metazeng is menge vaal zin, umbe mid-uswag sikandin wey meupiya is kebpengungubpaan din.
16 Midlevanan din is ketenged te menge pubri wey egkengeey-eyuwan, umbe midlampus sikandin. Iyan heeyan hustu he paaǥi te kedtehuza kedì te Nengazen.
17 Ne sikew mulà, wazè duma he tinguhè nu, kekenà, iyan dà is kebpenlimbung, kebpemenhimatey te menge wazà mekesalà, kebpendaagdaag, wey kebpenhukhuk.
18 Umbe, iyan heini migkaǥi te Nengazen mehitenged ki Hadì Jehoyakim he hadì te Juda, he anak ni Josia: “Wazà egkeseeng emun ebpatey sikandin. Is pemilya zin, is menge upisyal zin, wey kandan he ginsekupan ne kenà egkeseeng kandin.
19 Is kedlevenga kandin egkeiring dà te kedlevenga te minatey he asnu; eguyuzen ne idtimbag diyà te ǥawas te menge pultahan te Jerusalem.”
20 Sikiyu is menge etew ziyà te Juda, sineǥew kew su nezeetan en is kezapig niw he menge nasyun. Lalew kew ziyà te menge vuvungan te Lebanon. Sineǥawi niw sikandan diyà te Bashan wey Abarim.
21 Mibpetizeenan ku sikiyu hein meupiya pa is kebpekesavuk niw, piru wazè kew mebpemineg. Iyan en iyan heeyan betasan niw puun pa te kegkevatè niw; wazè kew mebpezumazuma kedì.
22 Ibpeyapat ku is langun menge pengulu niw, ne ebihaǥen is menge etew ziyà te kezapig niw he menge nasyun. Egkepeel-elezan kew tenged te langun he kelelalung niw.
23 Sikiyu is ebpemen-ubpà diyà te turuǥan he mibeelan pinaaǥi te menge kayu he sidru he ebpuun diyà te Lebanon, ebpekezag-es kew emun egkeumahan kew en te kemeresayan, iring te kedag-es te vahi he ebeliliten.
Is Lalag Mehitenged ki Jehoyakin
24 “Siak, is uuyag he Nengazen, ebpenangdù a he idselikwey ku sikew, Hadì Jehoyakin he hadì te Juda, he anak ni Jehoyakim. Minsan pa neiring ka te sising diyà te kewanan he velad ku ebpul-uten ku sikew.
25 Ibeǥey ku sikew te edtinguhà he edhimatey kenikew he igkahandek nu. Uya, ibeǥey ku sikew ziyà te ki Hadì Nebucadnezar he hadì te Babilonia wey te menge sundaru zin.
26 Idtimbag ku sikew wey is iney nu ziyà te selakew en he lugar, he kenà iyan mid-anakan keniyu, ne zutun kew is dezuwa ebpatey.
27 Kenè kew en ebpekelikù diyà te tanà he iyan pezem suat niw he mekelikù kew zutun.
28 Jehoyakin, neiring ka te nerupet he ziniyun he intimbag su wazè din en pulus. Iyan heeyan hinungdan ke maan is idtimbag ku sikew wey is menge anak nu ziyà te inged he wazè niw zuen hanew.”
29 Sikiyu is menge tig-Juda, pemineǥa niw is lalag te Nengazen.
30 Su iyan heini migkaǥi zin, “Idsurat he heini si Jehoyakin wazè din anak, su wazà minsan sevaha zuen te menge anak din he ebpekepengevilin te kedhedii ni David te Juda. Heini he etew ebpengungubpaan he kenà ebmeuswaǥen.”