23
Is Egkeperateng diyà te Huziyan he Timpu
1-2 Migkaǥi is Nengazen he Megbevayà te Israel te, “Mekehizuhizu kew is menge pengulu te menge etew ku! Iring kew pezem te menge perevantey te menge kerehidu. Iyan kew pezem ed-elima te menge etew ku, piru mibelaǥad niw sikandan ke ebpematey wey egkengetazintazin. Umbe, geina te migurigew niw is menge etew ku ne wazè niw etura, edsilutan ku sikiyu tenged kayi te mezaat he vaal niw.
3 Iyan a mismu edtiǥum te nesamà he menge etew ku puun diyà te nekedseselekawà he menge lugar he zutun ku sikandan ipeyapat, ne idlikù ku sikandan diyà te tanè dan, ne zutun ebmahabet sikandan utew.
4 Ebeǥayan ku sikandan te menge pengulu he ed-atur kandan, ne kenè dan en egkahandek wey egkeheratan, ne wazè en egketazin kandan. Iyan a, is Nengazen, is migkaǥi kayi.”
5 Migkaǥi pa is Nengazen te, “Egkeuma is timpu he ibpahadì ku is sevaha he metazeng he hadì he kevuwazan ni David. Edhadì sikandin he zuen din ketau, ne edhimuwen din is metazeng wey hustu para kayi he tanà.
6 Iyan heini ngazan he igngazan kandin: ‘Is Nengazen iyan Mibeǥey Kenitew te Ketazeng.’ Dutun he timpu egkelibri is Juda wey ebpekaangken te kelinew is Israel.
7 “Dutun he timpu is menge etew he ebpenangdù, kenè dan en egkaǥi te, ‘Ebpenangdù a pinaaǥi te uuyag he Nengazen he mibpeǥawas te menge Israilihanen puun te Ehipto.’
8 Kekenà, egkaǥi sikandan te, ‘Ebpenangdù a pinaaǥi te uuyag he Nengazen he mibpeǥawas te menge Israilihanen puun te nasyun diyà te zizaya wey ziyà te langun he nasyun he zutun din sikandan ipeyapat.’ Ne zutun ed-ubpà sikandan diyà te keugelingen dan he tanà.”
Is Silut te Teruen he menge Ebpeneuven
9 Henduen be te egkaawè en is gehinawa ku tenged te teruen he menge ebpeneuven. Mibpengerker is menge tulan ku, ne henduen be te nelangut a tenged te kegkesegradu te menge lalag he migkaǥi te Nengazen he ebpekesuǥat kandan.
10 Nepenù en is tanà te menge etew he ed-azap te tarù he menge megbevayà, su mibaal te mezaat is menge ebpeneuven wey mezaat is kegemita zan te ǥehem dan. Ne tenged kayi midrewakan te Nengazen is tanà, umbe mibmemaza heini ne nengeǥangu is menge pinemula.
11 Iyan heini migkaǥi te Nengazen: “Is menge memumuhat wey is menge ebpeneuven pudu kenà edsunud te Megbevayà, ne mibaal sikandan te mezaat minsan diyà te valey ku.
12 Umbe, egkehimu he melandeg wey merusirem is dalan dan. Ebpemekezulas wey egkengepiley sikandan, su ibpaaǥi ku ziyà te kandan is kezeetan dutun te timpu te kedsiluti ku kandan. Iyan a, is Nengazen, is migkaǥi kayi.
13 “Neehè ku he utew subra is kelelalung te menge ebpeneuven diyà te Samaria, su edheǥeten dan is menge tagnè dan pinaaǥi te ngazan ni Baal ne midtazin dan is menge etew ku he Israilihanen.
14 Piru neehè ku he edlavew pa he lalung is menge ebpeneuven diyà te Jerusalem. Mid-azap dan te zuma he menge ed-ezapen ne midtarùtarù dan pa. Ed-iniyaten dan is menge lalung te kebpeiseg te kelelalung dan. Umbe wazè dan engkezi is kelelalung dan. Is menge etew ziyà te Jerusalem, iring kezaat te menge etew ziyà te Sodom wey Gomora.
15 “Umbe siak, is Nengazen he Mekeǥeǥehem, migkaǥi a mehitenged kayi te menge ebpeneuven te: Ibpekaan ku sikandan te mepait he menge keenen wey ibpeinum ku te inumen he edsehuǥan te hilu; su tenged kandan midelandap en is kelelalung keniyan te tivuuk he tanà.”
16 Migkeǥiyan te Nengazen he Mekeǥeǥehem is menge etew ziyà te Jerusalem te, “Kenè kew pemineg te egkeǥiyen kayi te teruen he menge ebpeneuven. Ibpeperateng kew zan dà te tarù. Is egkeǥiyen dan he nengelewasan dan ne kenà diyà ebpuun te kediey su ziyè dà te isip dan.
17 Iyan heini layun egkeǥiyen dan diyà te menge etew he edsudì kedì wey ebpezumazuma te mesinupaken he ǥehinawa zan: ‘Egkehimu he utew meupiya is kebpekesavuk niw, migkaǥi is Nengazen. Wazà mezaat he egkehitavù keniyu.’
18 Piru hentei man kayi te menge teruen he ebpeneuven is netau te isip ku? Wazè man ganì sikandan mebpemineg te lalag ku wey wazè dan beliya is mibpengaǥi ku.
19 Pemineg kew! Is pauk ku iring te vagyu etawa eribpures he ebpekesuǥat te lalung he menge etew.
20 Kenà iyan egkaawà is pauk ku taman te egkeveelan ku is egkesuatan ku te ebaal. Ne ziyà te huziyan he timpu egkepurung niw zed egkesavut heini.
21 Wazè ku suǥua heini he menge ebpeneuven, piru migenat sikandan gihapun. Wazè ku sikandan lelaǥi, piru nenagnè dan ded.
22 Emun pezem netuenan dan ke hengkey is diyà te isip ku, midtudtul zan en pezem is menge lalag ku ziyà te menge etew ku, su para meengkezi zan is mezaat he menge vetasan dan wey menge vaal zan.
23 Megbevayà a he ziyà te minsan hendei ne kenà diyè dà te sevaha he lugar.
24 Wazà etew he ebpekeeles diyà te meeles he lugar he kenè ku egkaahà. Wazè niw ve metueni he ziyà a te minsan hendei ziyà te langit wey ziyà te tanà? Iyan a, is Nengazen, is migkaǥi kayi.
25 “Nezineg ku is tarù he mibpengaǥi te menge ebpeneuven he midheǥet dan pinaaǥi te ngazan ku. Egkaǥi sikandan te, ‘Duen menge lalag he migkaǥi te Nengazen diyà te kenami pinaaǥi te teǥeinep!’
26 Keenu ves buwa sikandan ed-engked he egkaǥi te tarù he ebpuun dà diyà te limbungan he isip dan?
27 Kunaan dan ke pinaaǥi te kedtudtula zan te menge teǥeinep dan, igketukù dan is menge etew ku para melipat kedì, iring te kegkelipati kedì te menge kepuun dan he pinaaǥi te ked-azap dan ki Baal.
28 Bey-ani en heini he menge ebpeneuven ke ebpenudtul zan te menge teǥeinep dan, piru sikan is menge ebpeneuven he nekezineg te lalag ku kinahanglan he edtudtulen dan heini te tinutuuwà. Su zuen kebpekedselekawà te teǥeinep dan wey is lalag ku iring te kebpekedselekawà te reǥami wey veǥas din.
29 Kenè be mekeǥeǥehem is lalag ku? Iring heini te hapuy he ebpeketutung wey masu he ebpekerupet te vatu.
30 “Umbe siak, is Nengazen, migkaǥi a te kuntada ku is menge ebpeneuven he ebpenudtul te menge lalag he ebpuun dà diyà te zuma he menge ebpeneuven ne egkeǥiyen dan he ziyà ebpuun te kedì.
31 Kuntada ku zaan is menge ebpeneuven he ebpenudtul te kandan dà he menge lalag ne egkeǥiyen dan te iyan a migkaǥi.
32 Kuntada ku is menge ebpeneuven he ebpenudtul te tarù he menge teǥeinep dan, ne midtazin dan is menge etew ku pinaaǥi te kebpenarùtarù dan. Wazè ku sikandan suǥùa te kebpenudtul. Umbe, wazà minsan hengkey he keupiyaanan he igkeveǥey zan diyà te menge etew. Iyan a, is Nengazen, is migkaǥi kayi.
33 “Jeremias, emun ed-insà diyà te kenikew heini he menge etew, etawa ebpeneuven, etawa memumuhat ke hengkey is menge lalag ku, ne keǥiyi nu sikandan he iyan migkaǥi ku is inselikwey ku sikandan.
34 Emun duen ebpeneuven, etawa memumuhat, etawa minsan hentei he egkaǥi te zuen menge lalag he edtudtulen din he ibpetudtul ku, edsilutan ku haazà he etew wey is pemilya zin.
35 Deyzey pa ke ed-insà is kada sevaha keniyu ziyà te menge emiǥu zin wey menge kezuzumahi zin ke hengkey is menge lalag ku,
36 kenè te egkaǥi sikandin te, ‘Duen menge lalag he ibpetudtul kandin te Nengazen.’ Su iyan heini egkeǥiyen dan su para tuuwi sikandan te zuma, umbe egketuis is menge lalag te uuyag he Megbevayà, he Nengazen he Mekeǥeǥehem.
37 “Jeremias, emun ed-insaan nu is sevaha he ebpeneuven ke zuen be egketudtul zin he ebpuun kayi te kediey,
38 ne ke egkaǥi sikandin te, ‘Uya, zuen egketudtul ku he ebpuun diyà te Nengazen.’ Kinahanglan he egkeǥiyan nu sikandin te iyan heini migkaǥi ku: ‘Geina te migkaǥi ka he zuen nu egketudtul he ebpuun kayi te kediey, minsan te imbandu ku kenikew is kegkaǥi keniyan,
39 edlipatan ku en sikew ne edsegseǥen ku sikew puun te etuvangan ku. Ne ebey-anan ku heini is inged he imbeǥey ku te menge kepuun niw.
40 Ibpeseǥazan ku keniyu is keelezan he taman te taman, he kenà egkelipatan.’ ”