11
Si Atalia wey si Joash
1 Hein netuenan ni Atalia he minatey en is anak din he si Hadì Ahazia he hadì te Juda, midisisyun sikandin he ebpenhimetayan din is langun he sakup te pemilya te hadì.
2 Piru midlibri ni Jehosheba is anak ni Ahazia he si Joash hein meǥaan en edhimetayi sikandin wey is duma pa he menge anak te hadì. Heini si Jehosheba etevey ni Ahazia he anak he vahi ni Hadì Jehoram. In-eles din si Joash wey is ed-elima kandin diyà te sevaha he ruǥu zuen te valey te Nengazen, umbe wazà sikandin mepatey.
3 Seled te heenem he tuig, ne ziyà i-eles te valey te Nengazen si Joash wey is ed-elima te iyan pa zutun ebmandù te Juda si Atalia he rayna.
4 Ne hein ikepitu he tuig, impetawag te memumuhat he si Jehoyada is menge peremandar te menge vantey te hadì wey is menge perevantey te turuǥan he medhendiyè dan te valey te Nengazen. Ne zuen neuyunan dan ne impepenangdù din sikandan diyà te valey te Nengazen. Ne hein nepasad impeehè din kandan is anak te hadì.
5 Migkeǥiyan din sikandan te, “Himuwa niw he tetelu kew he grupu. Iyan heini veeli niw: Is senge vahin keniyu te tetelu he vahin, he ebantey emun Andew te Kedhimeley, mebantey sikandan diyà te turuǥan te hadì.
6 Ne is senge vahin diyà mebantey te Pultahan te Sur. Ne is senge vahin pa, ne ziyà mebantey te ǥemawan te turuǥan su wey meuǥupi is duma he ebantey zutun.
7 Ne is dezuwa he grupu keniyu he kenà ebantey emun Andew te Kedhimeley ne ziyà sikandan mebantey te valey te Nengazen su para medipinsahi is hadì.
8 Kinahanglan he ebpurungan niw ebentayi is hadì he andam is menge ǥumaan niw, ne zumahi niw sikandin minsan hendei ebayà. Himetayi niw is minsan hentei he ed-uvey ziyà te kandin.”
9 Mibeelan dutun te menge peremandar is insuǥù kandan ni Jehoyada he memumuhat. Midtiǥum dan is menge etew zan he ebantey emun Andew te Kedhimeley, ragkes en is kenà ebantey keniyan he andew, ne miduma zan diyà te ki Jehoyada.
10 Ne mibeǥayan ni Jehoyada is menge peremandar te menge vangkew wey menge kelasag he ǥaked dengan ni Hadì David he ziyà itaǥù te valey te Nengazen.
11 Ne mibpelastar is neǥumeenan he menge vantey ziyà te peliǥuy te valey te Nengazen wey te pemuhatà te kedipinsa zuen te hadì.
12 Ne zutun impeǥawas ni Jehoyada si Joash he anak te hadì ne migkurunahan. Ne mibeǥayan din sikandin te kupya te menge sulunuzen mehitenged te kedumalà te hadì, ne impezayag din is kegkehimuwa ki Joash he hadì. Midlenahan din sikandin he ebpekilala he hadì en sikandin, ne mibpelakpak is menge etew wey nemengulahì te, “Mebmeluǥayad is untung te hadì!”
13 Ne hein nezineg ni Atalia is keǥurub te menge vantey wey te zuma he menge etew, midhendiyà sikandin te kandan diyà te valey te Nengazen.
14 Ne neehè din dutun is beǥu he hadì he midhitindeg uvey zuen te tukud, su iyan haazà neleyaman he vaal emun duen edhimuwen he hadì. Diyà te avey zuen te hadì is menge peremandar wey is menge perehiyup te trumpita, ne ebpemen-ugyab is langun he menge etew zutun wey ebpezaǥing te menge trumpita. Ne hein naahà ni Atalia haazà is langun, mibindas din is bisti zin su mibmezaat is gehinawa zin, ne nemensag sikandin te, “Menge meluiven! Menge meluiven!”
15 Mibmendaran ni Jehoyada is menge peremandar te menge sundaru te, “Uwita niw ziyà te gawas si Atalia. Kenè niw sikandin kayi himetayi te valey te Nengazen. Ne himetayi niw is minsan hentei he egkesuat he edlibri kandin.”
16 Umbe, midakep dan sikandin ne mid-uwit dan diyà te ǥawas te pultahan he ebpeveyaan te menge kudà te edhendiyà te turuǥan, ne zutun dan himetayi.
Is menge Keveg-uwan he Mibeelan ni Jehoyada
(2 Cronica 23:16-21)
17 Ne impehimu ni Jehoyada haazà is hadì wey is menge etew te kebpekid-uyun te Nengazen he menge etew en sikandan te Nengazen. Impehimu zin daan is uyun te hadì wey menge etew.
18 Ne midhendiyà is langun he menge etew te simbahan he para ki Baal ne midrundus dan heini. Midrupet dan is menge pemuhatà wey is menge ed-ezapen dutun, ne midhimetayan dan si Matan he memumuhat para ki Baal ziyà te egkesineruwan duen te menge pemuhatà.
Ne zuen menge impevantey ni Jehoyada zuen te valey te Nengazen.
19 Ne zutun, puun te valey te Nengazen, miduma zin is menge peremandar, menge vantey te hadì, menge vantey te turuǥan, wey is langun he menge etew zutun, ne midumahan dan haazà is hadì pehendiyà te turuǥan. Diyè dan mebayà te pultahan te menge vantey. Ne mibpinuu haazà is hadì diyà te pinuuwè din te kedhadì.
20 Nengelipey is menge etew, ne mibmelinew is inged hein minatey en si Atalia diyà te uvey te turuǥan.
21 Mibpenuiǥen si Joash te pitu he tuig dutun te kegkehimuwa kandin he hadì diyà te Judaa.