12
Is Kedhadì ni Joash diyà te Juda
(2 Cronica 24:1-16)
Nehimu he hadì diyà te Juda si Joash hein ikepitu he tuig te kedhadì ni Jehu ziyà te Israel. Diyà med-ubpà te Jerusalem si Joash, ne midhadì sikandin seled te 40 he tuig. Is iney zin iyan si Zibia he tig-Beersheba. Metazeng is baal zin diyà te etuvangan te Nengazen seled te tivuuk he untung din, su mibpenurù sikandin ni Jehoyada he memumuhat. Piru wazè din iperundus is menge simbahan diyà te metikang he menge lugar, umbe mibpedayun is menge etew te kebpemuhat te menge pemuhat wey kedtutung te menge beyewà dutun he menge simbahan.
Migkeǥiyan ni Joash is menge memumuhat te, “Tiǥuma niw is langun he selapì he mid-uwit diyà te valey te Nengazen he inhalad: is selapì he nekulikta tenged te sinsus, is selapì he vayad tenged te penaad, wey is selapì he pemuhat he kineugelingen he suat is kebpemuhata zuen. Ne ǥemita niw heini para te kebpurungi zuen te valey te Nengazen.”
Piru taman en te ike-23 he tuig te kedhadì ni Joash, wazà gihapun mepurungi te menge memumuhat sikan is baley te Nengazen. Umbe, impetawag ni Hadì Joash si Jehoyada wey is duma pa he menge memumuhat ne mid-insaan din te, “Maan is wazè niw pa pepurungi sikan is baley te Nengazen? Puun guntaan ne kenè niw en gestuwa is selapì diyà te keugelingen niw he menge kinahanglan. Ereg he ziyè en heini egemita te kebpurungi zuen te valey te Nengazen!” Ne mibpezumazuma zutun is menge memumuhat wey mibpezumazuma zan daan he kenè en iyan sikandan ebpengulikta te selapì puun te menge etew, wey kenè en iyan sikandan ebpepurung duen te valey te Nengazen.
Migkuwa si Jehoyada te kahun ne mibudsiyan din is tangeb kayi. Ne insavuk din heini ziyà te kilid te pemuhatà, diyà te egkekewanan emun edseled ki zuen te valey te Nengazen. Emun duen edseled duen te valey te Nengazen he ebeǥey te selapì, ne id-ahuk heini te menge memumuhat he ebantey te gemawan duen te kahun. 10 Ne emun dekelè en is selapì dutun te kahun, edhendutun is sikritaryu zuen te hadì wey is lavew he memumuhat ne ebilangen dan haazà ne emun egkepasad, id-ahuk dan diyà te menge bag. 11-12 Ne ibeǥey zan haazà is selapì diyà te menge etew he edumala te kebpurung duen te valey te Nengazen su wey zan mekevayad duen te ebpemenerebahu he menge etew he ebpurung duen te valey te Nengazen wey te menge verengbeng din. Is duma he selapì, ibpemasa zan te menge kayu wey menge vatu he vinesbasan en he egkinehenglanen te kebpurungi zuen te valey te Nengazen. Ne ebeyazan dan daan is duma pa he gelestuwan te kebpurung duen te valey.
13 Is selapì he imbeǥey ziyà te valey te Nengazen, ne wazà gemita para te kebaal te pelata he menge inumà, menge penamped te pebilu te sulù, menge yehung, menge trumpita, etawa minsan hengkey he ǥelemiten he vulawan etawa pelata dutun te valey te Nengazen. 14 Kekenà, imbayad heini te menge etew he ebpurung duen te valey wey te menge egkeǥamit kayi. 15 Wazè en tulika is listahan te menge neǥastu su egkeseriǥan sikan is menge etew he midumala te kebpurungi zuen te valey te Nengazen. 16 Is selapì he imbeǥey zuma te menge halad su imbayad te salà wey is menge pemuhat he para idlumpiyu, wazà haazà iahuk duen te kahun diyà te valey te Nengazen, su para zà haazà te menge memumuhat.
17 Dutun he timpu, si Hadì Hazael he hadì te Aram midsurung diyà te Gat ne naaǥew zin heini. Ne midisisyun sikandin he edsurungen din daan is Jerusalem. 18 Midtiǥum ni Hadì Joash is langun he menge azen he inhalad te menge kepuun din diyà te Nengazen, ragkes en is kandin he menge inhalad. (Is menge kepuun ni Joash he midhalad dutun he menge azen iyan si Jehoshafat, si Jehoram, wey si Ahazia, he menge hadì diyà te Juda.) Heini is langun impeuwit ni Joash diyà te ki Hazael, ragkes en is langun he vulawan he ziyà te menge budiga zuen te valey te Nengazen wey is diyà te turuǥan. Umbe wazè en surunga ni Hazael is Jerusalem.
19 Is duma pa he ǥuǥud mehitenged te kedhadì ni Joash, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda. 20 Dutun te huziyan he timpu nekidsukulà kandin is menge upisyal zin, ne midhimetayan dan sikandin diyà te Bet Milo, diyà te zalan he pehendiyà te Silla. 21 Is menge upisyal he midhimatey kandin, iyan si Jozacar he anak ni Shimeat wey si Jehozabad he anak ni Shomer. Inleveng sikandin diyà te midlevengan te menge kepuun din diyà te Inged ni David. Ne si Amazia he anak din iyan nekeilis kandin te kedhadì.