3
Mid-umanan Benguna is menge Berengbeng te Jerusalem
1 Is mibangun te Pultahan te menge Kerehidu iyan si Eliashib he lavew he memumuhat wey is duma zin he menge memumuhat. Ne hein nepasad dan te edtaud is menge lekeb kayi, impehinungud dan heini ziyà te Megbevayà. Mibangun dan daan wey impehinungud dan is menge verengbeng pehendiyà te Turi te Nenggatus wey Turi ni Hananel.
2 Ne is mibangun te sunud he vahin duen te verengbeng iyan is menge tig-Jerico. Ne is mibangun sunud kandan iyan si Zacur he anak ni Imri.
3 Is mibangun te Pultahan te menge Isdà iyan is menge anak ni Hasenaa. Midsevukan dan heini te menge velavag, ne zutun dan itaud is menge lekeb, ne mibeelan dan te menge trangka.
4 Is mibangun te sunud he vahin duen te verengbeng iyan si Meremot he anak ni Uria wey apù ni Hakoz. Ne is sunud kandan iyan si Meshulam he anak ni Berekia wey apù ni Meshezabel. Ne is nekesunud pa iyan si Zadok he anak ni Baana.
5 Ne is nekesunud kandin iyan is menge tig-Tekoa. Piru wazà medtuman is menge pengulu zan te ebpeveelan kandan te ebpemendumala te terebahu.
6 Is mibangun te Zaan he Pultahan iyan si Joyada he anak ni Pasea wey si Meshulam he anak ni Besodea. Midsevukan dan heini te menge velavag, ne zutun dan itaud is menge lekeb, ne mibeelan dan te menge trangka.
7 Is mibangun te sunud pa he vahin duen te verengbeng iyan en si Melatia he tig-Gibeon, si Jadon he tig-Meronot, wey is menge maama he menge tig-Gibeon wey tig-Mizpa. Heini is menge lugar zan, midumala te gubirnedur ziyà te prubinsya he zapit te edsenlepan te Eufrates.
8 Ne is mibangun te sunud pa he vahin te verengbeng iyan si Uziel he platiru, he anak ni Harhaya. Ne is sunud kandin iyan si Hanania he perevaal te pehemut. Mibangun dan haazà he vahin te verengbeng te Jerusalem taman te Meluag he Berengbeng.
9 Is sunud kandan iyan is anak ni Hur he si Refaya, he pengulu te ketengà te distritu te Jerusalem.
10 Is sunud kandin iyan si Jedaya he anak ni Harumaf. Mibangun din is bahin te verengbeng he uvey te valey zin. Is sunud kandin iyan si Hatush he anak ni Hashabnea.
11 Is mibangun te sunud pa he vahin te verengbeng wey Turi he zuen duen menge Hepuyan iyan si Malkia he anak ni Harim wey si Hashub he anak ni Pahat Moab.
12 Is sunud kandan iyan is anak ni Halohesh he si Shalum, he pengulu te ketengà he distritu te Jerusalem. Mid-uǥupan sikandin te menge anak din he menge vahi.
13 Is mibangun te Pultahan he Ebpekesinaru ziyà te Suǥud-suǥud iyan si Hanun wey is menge tig-Zanoa. Intaud dan is menge lekeb kayi, ne mibeelan dan te menge trangka. Mibangun dan daan is 1,500 he ǥiek he verengbeng he taman te Pultahan te Pehendiyà te Timbaǥà te Besura.
14 Is mibangun te Pultahan te Pehendiyà te Timbaǥà te Besura iyan si Recab he anak ni Malkia, he pengulu te distritu te Bet Hakerem. Intaud din is menge lekeb kayi, wey mibeelan te menge trangka.
15 Is mibangun te Pultahan Pehendiyà te Serebseb iyan is anak ni Col Hoze he si Shalum, he pengulu te distritu te Mizpa. Mid-etepan din heini, intaud din is menge lekeb, wey mibeelan din te menge trangka. Mibangun din daan is berengbeng te pemeziǥuey he Siloam, he uvey te pemuleey te hadì, taman te veyeey he mid-iring te heǥezan he impetupang puun te Inged ni David.
16 Is sunud kandin iyan is anak ni Azbuk he si Nehemias, he pengulu te ketengà te distritu te Bet Zur. Mibangun din is berengbeng he ebpekesinaru ziyà te penlevengà ni David taman diyà te pemeziǥuey he mibpeveelan wey ubpeey te menge sundaru.
17 Is mibangun te sunud pa he vahin te verengbeng iyan is menge Levihanen he mibpenguluwan ni Rehum he anak ni Bani. Is sunud kandin iyan si Hashabia he pengulu te ketengà te distritu te Keila.
18 Is sunud kandin iyan is emurè din te meǥinged he mibpenguluwan te anak ni Henadad he si Binui, he pengulu te ketengà te distritu te Keila.
19 Is sunud iyan is anak ni Jeshua he si Ezer he pengulu te Mizpa. Mibangun din is bahin te verengbeng he ebpekesinaru ziyà te teleǥuey te menge ǥumaan taman diyà te suyuk te verengbeng.
20 Is sunud pa ne iyan si Baruc he anak ni Zabai. Mevaghet sikandin he mibangun te vahin te verengbeng puun te suyuk te verengbeng pehendiyà te pultahan diyà te leǥidlizan te valey ni Eliashib te lavew he memumuhat.
21 Is sunud kandin iyan si Meremot he anak ni Uria wey apù ni Hakoz. Mibangun din is bahin te verengbeng puun te pultahan he ziyà te leǥidlizan te valey ni Eliashib taman te kilid kayi he valey.
22 Is sunud he mibangun te vahin te verengbeng iyan is menge memumuhat he ziyà te peliǥuy te Jerusalem.
23 Is sunud kandan iyan si Benjamin wey si Hashub. Mibangun dan is bahin te verengbeng he ebpekesinaru ziyà te valey zan. Is sunud kandan iyan si Azaria he anak ni Maasea wey apù ni Anania. Mibangun din is bahin te verengbeng he ziyà te kilid te valey zin.
24 Is sunud iyan si Binui he anak ni Henadad. Mibangun din is bahin te verengbeng puun te valey ni Azaria taman te suyuk te verengbeng. Ikezuwe en heini he vahin te verengbeng he mibangun dan.
25 Is sunud pa ne iyan si Palal he anak ni Uzai. Mibangun din is bahin te verengbeng puun te suyuk duen te verengbeng wey zuen te turi he ebpekelapew te turuǥan, he uvey te ubpeey te menge vantey. Is sunud kandin iyan si Pedaya he anak ni Parosh,
26 wey is menge suluǥuen diyà te valey te Nengazen he meǥinged diyà te mibuntud-buntud he Ofel. Mibangun dan is bahin te verengbeng he zapit te edsilaan, taman te Pultahan Pehendiyà te Wahig wey zuen te ebpekelapew he turi.
27 Is sunud kandan iyan is menge tig-Tekoa. Mibangun dan is bahin te verengbeng he puun te ebpekelapew te zekelà he turi taman te verengbeng diyà te mibuntud-buntud te Ofel. Ikezuwe en heini he vahin te verengbeng he mibangun dan.
28 Is mibangun te vahin te verengbeng he puun te Pultahan te menge Kudà petekezeg iyan is menge memumuhat. Mibangun te kada sevaha kandan is berengbeng he ziyà ebpekesinaru te valey zin.
29 Is sunud kandan iyan si Zadok he anak ni Imer. Mibangun din is bahin te verengbeng he ziyà ebpekesinaru te valey zin. Is sunud kandin iyan is anak ni Shecania he si Shemaya, he vantey te Pultahan diyà te Edsilaan.
30 Is sunud kandin iyan si Hanania he anak ni Shelemia wey si Hanun he ikeenem he anak ni Zalaf. Ikezuwe en heini he vahin te verengbeng he kandin he mibangun. Is nekesunud kandan iyan si Meshulam he anak ni Berekia. Mibangun din is bahin te verengbeng he ziyà ebpekesinaru te valey zin.
31 Is sunud pa ne iyan si Malkia he sevaha te menge platiru. Mibangun din is bahin te verengbeng taman te ubpeey te menge suluǥuen he ziyà edterebahu te valey te Nengazen wey menge nigusyanti, he zutun ebpekesinaru te Pultahan te Tiǥumà, wey taman te ruǥu he ziyà te zivavew zuen te suyuk te verengbeng.
32 Is mibangun te vahin te verengbeng puun dutun he ruǥu taman te Pultahan te menge Kerehidu iyan is menge platiru wey menge nigusyanti.