4
Duen Mibelavag te Kebenguna te Berengbeng
1 Hein netudtulan si Sanbalat he mid-uman dey venguna is berengbeng, nepauk sikandin ne mid-undaunda key zin is menge Judio.
2 Diyà te etuvangan te menge zuma zin wey te menge sundaru ziyà te Samaria, migkaǥi sikandin te, “Hengkey is ebeelan kayi te mekehizuhizu he menge Judio? Kunaan dan buwa ke egkeuman dan egkevangun is menge verengbeng te Jerusalem seled dà te senga andew, ne ebpekeuman dan ebpekepemuhat. Kunaan dan buwa ke egkeǥamit dan pa is netutung wey nerupet he menge vatu zuen te verengbeng!”
3 Ne migkaǥi zaan si Tobia he Amunihanen he ziyà te avey ni Sanbalat te, “Minsan laku zà is egampan keniyan he verengbeng ne egketempag en!”
4 Ne zutun mid-ampù a, ke siak te, “He Megbevayè dey, pemineǥa key kenikew su edsusudien key. Deyzey ke ziyà egkehitavù te kandan is menge insultu zan kenami. Berakat he vihaǥa sikandan diyà te zuma he lugar.
5 Kenè nu sikandan peseyluwa su midhimu zan he mepauk ka ziyà te etuvangan dey te ebpemenerebahu te kebangun te verengbeng.”
6 Mibpedayun key he edterebahu taman te nevangun dey en is ketengà te ketikang te verengbeng, su nenigudu medterebahu is menge etew.
7 Piru hein netuenan ni Sanbalat, ni Tobia, wey menge Arabo, menge tig-Amon, menge tig-Ashdod he ebpeniguduwan dey is kebangun te verengbeng te Jerusalem wey nesengseng en is menge vudsi kayi, ne nepauk sikandan.
8 Mibpelanu zan is langun he edsurungen dan is Jerusalem su para megurigew key.
9 Piru nengemuyù key ziyà te Megbevayè dey. Ne maandew wey mezukilem duen ibpevantey zey su para kenè key mekeizi.
10 Dutun he timpu, migkaǥi is menge tig-Juda te, “Neveley key en he edterebahu. Ne zekelè pa is nengerupet he vahin te verengbeng he kinahanglan he edhekuten. Umbe kenè dey heini egkehimu te edhimasad.”
11 Dutun daan he timpu, migkaǥi is menge kuntada zey te, “Edhendiyè kiw te kandan te meeles. Ne ebpenhimetayan tew sikandan su para meengked is kedterebahu zan.”
12 Is menge Judio he meǥinged diyà te uvey zutun te menge kuntada zey, layun key zan edtudtuli mehitenged te pelanu zutun he menge etew te kedsurung kenami.
13 Umbe, zuen menge impevantey ku zuen te kinemevevaan he menge vahin dutun te verengbeng he melemu zà ebpekevayà dutun is edseled. Impevantey ku sikandan dutun he migrupu is kada pemilya, ne neǥumeenan sikandan te ispada, bangkew, wey panà.
14 Ne zutun te kemulu ku pa ed-is-isipa is kebpekesavuk dey, impetawag ku is menge pengulu, menge upisyal, wey menge meǥinged, ne migkeǥiyan ku te, “Kenè kew mahandek te menge kuntada tew. Edtentenuzan tew zà is mekeǥeǥehem wey egkein-inuwan he Nengazen. Ebpekidtebek kiw su para melibri tew is menge kezuzumahi tew, menge anak tew, menge esawa tew, wey menge valey tew.”
15 Piru hein netuenan te menge kuntada zey he netuenan dey is pelanu zan te kedsurung kenami, wey neisip-isip dan he midezeetan te Megbevayà is pelanu zan, midlikù key pudu medterebahu te kebangun te verengbeng.
16 Iyan, puun dutun he andew, liwazè dà te menge etew ku is impeterebahu ku ziyà te verengbeng, su is liwazà impevantey ku he zuen dan pengalang te kumeng, menge vangkew, menge kelasag, wey menge panà. Is menge upisyal ziyà ebpemenhitindeg te egkeiniyuǥan te menge tig-Juda
17 he ebpemenerebahu zuen te verengbeng. Is ebpemenerebahu, egkulang te ǥelemiten te kedterebahu is divaluy he velad dan ne egkulang te gumaan is divaluy,
18 ne edseseluniket pa sikandan te ispada. Ne is ebpezaǥing te vudyung, layun diyà te avey ku.
19 Migkeǥiyan ku is menge pengulu, menge upisyal, wey menge meǥinged te, “Meluag is edterebehuwan tew ne ebpekediziyù kiw.
20 Umbe, emun egkezineg niw is daǥing te vudyung, ne tiǥum kew kayi te kediey. Iyan ebpekidtebek para kenitew is Megbevayè tew.”
21 Umbe, ebpenigudu key en edterebahu puun te meselem taman te egkesakep, ne is ketengà kenami ebantey he neǥumeenan.
22 Dutun he timpu, migkeǥiyan ku zaan is menge zuma zey he ziyà ebpemen-ubpà te ǥawas te Jerusalem he medseled dan dutun te inged duma te menge suluǥuen dan emun mezukilem su wey zan mekevantey, ne kegkemeselem ebpeketerebahu zan en maan.
23 Ne tenged te kenè key ed-engked he ebantey, ne siak wey is menge kezuzumahi ku, menge etew ku, wey is menge vantey, ne wazè key en med-ilis te kumbalè dey. Ne minsan edhendiyè key te wahig, uwiten dey is menge ǥumaan dey.