3
Is menge Kevuwazan ni Levi
1 Iyan heini keguǥuza mehitenged te menge kevuwazan ni Aaron wey ni Moises he ingkesurat hein timpu te kebpekidlalag te Nengazen ki Moises diyà te Buntud he Sinai.
2 Is menge anak ni Aaron iyan ensi Nadab, Abihu, Eleazar, wey si Itamar. Iyan kakey si Nadab.
3 Mibpilì wey mid-urdinahan sikandan wey zan mekepenilbi pinaaǥi te kegkememumuhat.
4 Piru si Nadab wey si Abihu, minatey ziyà te etuvangan te Nengazen hein migamit dan te hapuy he kenà iyan sikan is hapuy he para te kebpemuhata te Nengazen hein diyè dan te sibsivayan he Sinai. Minatey sikandan he wazè dan menge anak, umbe iyan dà si Eleazar wey si Itamar nenilbi pinaaǥi te kegkememumuhat dutun te kaazen pa te amey zan he si Aaron.
5 Migkaǥi is Nengazen diyà te ki Moises te,
6 “Ipetawag nu is tribu ni Levi ne zumaha nu ziyà te ki Aaron he memumuhat su wey zan mekeuǥup kandin.
7 Ebpenilbi zan ki Aaron wey te langun he menge etew te Israel pinaaǥi te kebaal te menge vuluhaten diyà te Tulda he Ed-ezapan he egngezanan daan te Tulda he Edtelevukaayan.
8 Iyan daan sikandan ed-atur te langun he menge gelemiten duen te Tulda he Edtelevukaayan, ne ebpenilbi zan dutun te Tulda para te menge Israilihanen.
9 Ebpeveyveyaan ki Aaron wey ziyà te menge anak din he maama is menge kevuwazan ni Levi su wey metevangi sikandan.
10 Iyan, himuwa nu he memumuhat si Aaron wey is menge anak din. Is minsan hentei he ebaal te vuluhaten te memumuhat diyà te Tulda he Ed-ezapan he kenà kevuwazan ni Levi ne ereg he edhimetayan.”
11 Migkaǥi pa is Nengazen diyà te ki Moises te,
12 “Mibpilì ku is menge kevuwazan ni Levi he liwan te menge kinekekayan he anak he menge maama te menge Israilihanen. Kediey is kada kevuwazan ni Levi.
13 Su kediey man is langun he kinekekayan he maama kayi te Israel. Hein mibpenhimetayan ku is langun he kinekekayan he maama ziyà te Ehipto, ne intapid ku en he para kedì is langun he kinekekayan he maama kayi te Israel, etew etawa uyaǥen. Umbe ǥaked ku sikandan. Iyan a kes Nengazen.”
14 Migkeǥiyan te Nengazen si Moises diyà te sibsivayan he Sinai te,
15 “Bilanga nu is menge kevuwazan ni Levi he menge maama sumalà te pemilya zan. Bilanga nu is senge vulan is keǥurang din pehendiyà te metikang.”
16 Umbe, mibilang sikandan ni Moises sumalà te insuǥù kandin te Nengazen.
17 Iyan heini menge anak ni Levi: si Gershon, si Kohat, wey si Merari.
18 Is menge anak ni Gershon iyan si Libni wey si Shimei.
19 Is menge anak ni Kohat iyan ensi Amram, Izhar, Hebron, wey Uziel.
20 Is menge anak ni Merari iyan ensi Mali wey Mushi.
Iyan sikandan menge kevuwazan ni Levi he inlista sumalà te menge pemilya zan.
21 Is menge kevuwazan ni Gershon iyan kes menge pemilya he ebpuun diyà te ki Libni wey ki Shimei.
22 Is kahabet te menge maama kandan he is keǥurang dan senge vulan pehendiyà te metikang ne 7,500.
23 Is lugar he egkempuwan dan ne ziyà dapit te egkeiniyuǥan duen te Tulda he Ed-ezapan, he ziyà te zapit te edsenlepan duen te tulda.
24 Is pengulu zan iyan si Eliasaf he anak ni Lael.
25 Iyan sikandan midseriǥan te ked-atur te menge gelemiten duen te Tulda he Edtelevukaayan he iyan heini: menge tambun, is kurtina te gemawan te Tulda,
26 is menge kurtina ziyà te lama he impeliǥuy zuen te Tulda wey pemuhatà, ragkes en is kurtina te pultahan duen te lama, wey is menge hiket kayi. Kandan he ketengdanan is langun he vuluhaten he para kayi he menge gelemiten.
27 Is menge kevuwazan ni Kohat iyan sikan is menge pemilya eni Amram, Izhar, Hebron, wey Uziel.
28 Is kahabet te menge maama kandan he is keǥurang dan senge vulan pehendiyà te metikang ne 8,600. Insarig daan kandan is ked-atur zuen te Tulda he Edtelevukaayan.
29 Is lugar he egkempuwan dan ne ziyà dapit te zivavà duen te Tulda.
30 Ne iyan pengulu zan si Elizafan he anak ni Uziel.
31 Iyan sikandan daan midseriǥan te ked-atur te menge himan duen te Tulda he Edtelevukaayan he iyan is: Kavan te Kebpekid-uyun, lemisahan, selevukà te sulù, menge pemuhatà, menge gelemiten he egemiten te menge memumuhat emun ebaal zan te vuluhaten dan, wey zuen te kurtina ziyà te seled te Tulda. Kandan he ketengdanan is langun he vuluhaten he egkeǥemitan kayi he menge gelemiten.
32 Is pengulu te menge kevuwazan ni Levi iyan si Eleazar he anak ni Aaron he memumuhat. Iyan sikandin mibpilì he edumala zuen te menge etew he insarig kandan is ked-atur zuen te Tulda.
33 Is menge kevuwazan ni Merari iyan is menge pemilya he ebpuun diyà te ki Mali wey ki Mushi.
34 Is kahabet te menge maama kandan he is keǥurang dan senge vulan pehendiyà te metikang ne 6,200.
35 Is pengulu zan iyan si Zuriel he anak ni Abihail. Is lugar he egkempuwan dan ne ziyà te egkezizaya zuen te Tulda.
36 Iyan sikandan midseriǥan te ked-atur te tabla he elavat duen te Tulda, menge marku, menge tukud, wey menge pundasyun kayi. Kandan he ketengdanan is langun he menge vuluhaten he egkeǥemitan kayi he menge gelemiten.
37 Iyan daan sikandan midseriǥan te ked-atur te menge tukud diyà te ǥawas duen te lama wey te menge pundasyun kayi, menge palpal wey menge hiket kayi.
38 Si Moises wey si Aaron wey is menge anak din, ne ziyè dan megkampu zapit te egkesineruwan duen te Tulda he Edtelevukaayan he zapit te edsilaan. Iyan sikandan midseriǥan te kedumala te menge vuluhaten duen te Tulda he para te menge Israilihanen. Is minsan hentei he ebaal te vuluhaten te memumuhat dutun te Tulda he kenà kevuwazan ni Levi ereg he edhimetayan.
39 Is kahabet te langun he menge maama he kevuwazan ni Levi he is keǥurang dan senge vulan pehendiyà te metikang ne 22,000. Si Moises wey si Aaron is mibilang kandan sumalà te insuǥù te Nengazen kandan.
40 Migkaǥi is Nengazen diyà te ki Moises te, “Bilanga nu wey ilista is menge ngazan te langun he kinekekayan he menge anak he maama te menge Israilihanen he is keǥurang dan senge vulan pehendiyà te metikang.
41 Ipehinungud niw kayi te kedì is menge kevuwazan ni Levi he ilis te langun he kinekekayan he maama he menge anak te menge Israilihanen. Ipehinungud niw zaan kayi te kedì is menge uyaǥen te menge kevuwazan ni Levi he ilis te langun he kinekekayan he menge uyaǥen te menge Israilihanen. Iyan a Nengazen.”
42-43 Umbe, mibilang ni Moises is langun he kinekekayan he menge maama he menge anak te menge Israilihanen he is keǥurang dan senge vulan pehendiyà te metikang, sumalà te insuǥù te Nengazen kandin. Is kahabet dan nekeuma te 22,273.
44-45 Migkaǥi pa is Nengazen diyà te ki Moises te, “Ipehinungud niw kayi te kedì is menge kevuwazan ni Levi he ilis te langun he kinekekayan he menge anak he maama te menge Israilihanen. Ipehinungud niw zaan is menge uyaǥen te menge kevuwazan ni Levi he ilis te kinekekayan he menge uyaǥen te menge Israilihanen. Kediey is menge kevuwazan ni Levi. Iyan a Nengazen.
46 Geina te midsubra te 273 is kinekekayan he maama he menge anak te menge Israilihanen kenà te menge kevuwazan ni Levi, kinahanglan he edlekaten sikandan.
47 Ne para melekat sikandan, kinahanglan he ebeyazan is kada sevaha kandan te lelima he vuuk he pelata he ibpesikad diyà te keveǥat te pelata ziyà te timbangan he egemiten te menge memumuhat.
48 Ne ibeǥey nu haazà diyà te ki Aaron wey te menge anak din is selapì he idlekat te nenubra he menge kinekekayan.”
49 Umbe, migkulikta ni Moises is selapì he idlekat te menge kinekekayan he menge anak te menge Israilihanen he midsubra te kahabet te menge kevuwazan ni Levi.
50 Is nekulikta zin 1,365 he vuuk he pelata, he impesikad diyà te keveǥat te pelata ziyà te timbangan he egemiten te menge memumuhat.
51 Ne imbeǥey zin heini ziyà te ki Aaron wey ziyà te menge anak ni Aaron he menge maama sumalà te insuǥù kandin te Nengazen.