4
Is menge Kevuwazan ni Kohat
1 Migkeǥiyan te Nengazen si Moises wey si Aaron te,
2 “Sinsusa niw is menge kevuwazan ni Kohat he sakup te tribu ni Levi; sinsusa is kada kezuzumahi wey is menge pemilya zutun.
3 Bilanga niw is langun he maama he is penuiǥen dan 30 pehendiyà te 50 he tuig, he ebpekehimu he ebpenilbi ziyà te Tulda he Edtelevukaayan.
4 “Is buluhaten te menge kevuwazan ni Kohat diyà te Tulda he Edtelevukaayan iyan is ked-atur te utew segradu he menge vutang.
5 Emun ed-awè kew zutun te kampu niw, kinahanglan he edseled si Aaron wey is menge anak din duen te Tulda ne egkuwaan dan is kurtina ziyà te seled, ne idtambun dan heini zuen te Kavan te Kebpekid-uyun.
6 Ne kegkepasad dutun, ed-umanan dan pa heini edtembuni te meupiya he kelasi he lundis wey manggad he meitem is kaavuavu zin, ne idtaud dan is menge tival kayi.
7 “Tembuni zan daan te manggad he meitem is kaavuavu zin is lemisahan he selevukà te supas he ibpemuhat diyà te etuvangan te Megbevayà, ne isavuk dan dutun te lemisahan is menge pinggan, menge tasa, menge yahung, menge tivud he teleǥuey te pemuhat he inumen, wey menge supas he layun dutun te lemisahan.
8 Ne kegkepasad dutun edtembunan dan heini te manggad he kanggan, ne ed-umanan dan pa heini edtembuni te meupiya he kelasi he lundis, ne idtaud dan is menge tival kayi.
9 “Is selevukà te sulù edtengesen dan te manggad he meitem is kaavuavu zin ragkes en is menge sulù dutun, menge lipit, menge taya te igmuk te pebilu te sulù, wey menge tivud he teleǥuey te lana he idtubil te sulù.
10 Edtengesen dan heini is langun te meupiya he kelasi he lundis, ne ibpikit dan duen te tival.
11 “Tembuni zan daan te manggad he meitem is kaavuavu zin sikan is pemuhatà he vulawan ne edtembunan dan pa heini te meupiya he kelasi he lundis, ne itaud dan is menge tival para kayi.
12 Is duma pa he menge gelemiten he egemiten te kebpenilbi zutun te Tulda, edtengesen daan te manggad he meitem is kaavuavu zin wey te meupiya he kelasi he lundis, ne ibpikit heini zuen te tival.
13 “Kinahanglan he id-awè dan is avu zuen te pemuhatà, ne edtembunan heini is pemuhatà te manggad he merudtem.
14 Ne isavuk dan kayi te pemuhatà is langun he ǥelemiten para kayi: is menge selevukà te vaǥa, is dezekelà he menge tinidur he para te usa, is menge pala, wey is menge yehung. Ne tembuni zan heini te meupiya he kelasi he lundis, ne itaud dan is menge tival kayi.
15 “Emun egkepasad en ni Aaron wey te menge anak din te edtambun sikan is Tulda he Edtelevukaayan wey is langun he menge gelemiten kayi, ne edtivalen heini te menge kevuwazan ni Kohat dutun te timpu te ked-awè niw puun te kampu niw. Piru kinahanglan he kenè dan semsama heini is segradu he menge vutang su wey zan kenà mebpatey.
“Iyan haazà sikan is menge gelemiten duen te Tulda he Edtelevukaayan he ed-uwiten te menge kevuwazan ni Kohat.
16 Si Eleazar he anak ni Aaron he memumuhat, kandin he ketengdanan is bahin duen te lana he para te menge sulù, menge veyewà, kada andew he pemuhat he para gasa, wey is lana he para te idlana. Iyan sikandin edumala te vuluhaten para zutun te tivuuk he Tulda wey te langun he menge gelemiten kayi.”
17 Migkaǥi is Nengazen diyà te ki Moises wey ki Aaron te,
18 “Kenè niw pesegdana he mepuew is kevuwazan ni Kohat puun te menge Levihanen.
19 Iyan heini veeli niw para kenà sikandan mebpematey emun ed-uvey sikandan duen te utew segradu he menge vutang: Kinahanglan he eduma kandan si Aaron wey is menge anak din emun edseled dan duen te Tulda ne egkeǥiyen diyà te kandan ke hengkey is ereg he ebeelan dan wey kinahanglan he ed-uwiten dan.
20 Su emun kenà sikandan edumahan, kenè dan medseled te ked-ahà te segradu he menge vutang minsan meǥaan dà, su wey zan kenà mebpatey.”
Is menge Kevuwazan ni Gershon
21 Migkeǥiyan te Nengazen si Moises te,
22 “Sinsusa nu zaan is menge kevuwazan ni Gershon sumalà te pemilya zan.
23 Bilanga nu zaan is langun he maama kandan he is penuiǥen dan 30 pehendiyà te 50 he tuig, he ebpekehimu te kebaal te menge vuluhaten diyà te Tulda he Edtelevukaayan.
24 “Is buluhaten te menge kevuwazan ni Gershon iyan is ked-uwit kayi he menge vutang:
25 menge kurtina zuen te Tulda he Ed-ezapan, (egngezanan daan te Tulda he Edtelevukaayan), is langun he menge tambun he para idtambun kayi, wey is menge kurtina te ǥemawan,
26 is menge kurtina zuen te lama he nekepeliǥuy zuen te Tulda wey pemuhatà, is kurtina ziyà te ǥemawan te lama, is menge hiket, wey is langun he ǥelemiten he egemiten te kebpenilbi zutun te Tulda. Kandan he vaal is langun he vuluhaten he egkeǥemitan kayi he menge gelemiten.
27 Si Aaron wey is menge anak din iyan edumala te menge kevuwazan ni Gershon mehitenged te vuluhaten dan, ed-uwit daan sikandan te menge gelemiten etawa ebaal te zuma he menge vuluhaten. Iyan kew ki Aaron kaǥi ke hengkey is ed-uwiten dan.
28 Iyan heeyan menge vuluhaten te menge kevuwazan ni Gershon diyà te Tulda he Edtelevukaayan. Dizalem sikandan te kedumala ni Itamar he anak ni Aaron he memumuhat.”
Is menge Kevuwazan ni Merari
29 “Sinsusa nu zaan is menge kevuwazan ni Merari; sinsusa is kada kezuzumahi wey is menge pemilya zutun.
30 Bilanga nu is langun he menge maama he is penuiǥen dan 30 pehendiyà te 50 he tuig, he ebpekehimu te vuluhaten diyà te Tulda he Edtelevukaayan.
31 Iyan heini vuluhaten dan diyà te Tulda he Edtelevukaayan: iyan sikandan ed-uwit te menge tabla he elavat duen te tulda, menge marku kayi, menge tukud, wey menge pundasyun.
32 Iyan daan sikandan ed-uwit te menge tukud he edteuzan te menge kurtina he ibpeliǥuy zuen te Tulda, wey menge pundasyun kayi, menge palpal wey menge hiket. Kandan he vaal is langun he menge vuluhaten he egkeǥemitan kayi he menge gelemiten. Iyan kew ki Aaron kaǥi ziyà te kada sevaha kandan ke hengkey is kinahanglan he ed-uwiten dan.
33 Iyan heeyan menge vuluhaten te menge kevuwazan ni Merari ziyà te Tulda he Edtelevukaayan. Dizalem sikandan te kedumala ni Itamar he anak ni Aaron he memumuhat.”
Is Kedsinsusa te menge Kevuwazan ni Levi
34-48 Tenged te kedtuman te insuǥù te Nengazen, midsinsus eni Moises, Aaron, wey te menge pengulu te Israel is menge kevuwazan ni Kohat, ni Gershon, wey ni Merari; midsinsus is kada kezuzumahi wey is menge pemilya zutun. Inlista zan is langun he menge maama kandan he is penuiǥen dan 30 pehendiyà te 50 he tuig he ebpekehimu te menge vuluhaten diyà te Tulda he Edtelevukaayan, ne iyan heini kahabet dan:
Pemilya; Kahabet
Kohat; 2,750
Gershon; 2,630
Merari; 3,200
Is tivuuk he kahabet dan, 8,580 langun.
49 Umbe, sumalà te insuǥù te Nengazen ki Moises, mibilang sikandan ne mibeǥayan te vuluhaten is kada sevaha kandan wey migkeǥiyan ke hengkey is ed-uwiten din.