8
Is Kebpelestara te menge Sulù
1 Migkeǥiyan te Nengazen si Moises te,
2 “Keǥiyi nu si Aaron he emun ibpelastar zin en is pitu he sulù, kinahanglan he ziyè din heini ipelastar te egkeenlaǥan te kerayag din is diyà te egkesineruwan te selevukà kayi.”
3 Umbe, mibeelan haazà ni Aaron: impelastar zin haazà is menge sulù diyà te lugar he egkeenlaǥan te kerayag din is egkesineruwan te selevukà kayi, sumalà te insuǥù te Nengazen ki Moises.
4 Bulawan haazà is tivuuk he selevukà te menge sulù puun te zizalem pehendiyà te zivavew su iyan haazà kebeeli zuen he impaahà te Nengazen diyà te ki Moises.
Is Kebpehinunguza te menge Kevuwazan ni Levi
5 Migkaǥi is Nengazen diyà te ki Moises te,
6 “Isivey nu is menge kevuwazan ni Levi puun te zuma he menge Israilihanen ne lumpiyuwi nu sikandan.
7 Iyan heini veeli nu te kedlumpiyu kandan: Piriki nu sikandan te wahig he ǥelemiten te kedlumpiyu ne pekiskisi nu is tivuuk he lawa zan wey pepìpii nu is menge visti zan. Ne kegkepesad dutun ed-isipen en sikandan he lumpiyu.
8 Ne ipeuwit nu sikandan te turiti he vaka wey pemuhat he para gasa he meupiya he kelasi te herina he midsehuǥan te lana. Ipeuwit nu zaan sikandan te sevaha pa he turiti he vaka he pemuhat he para idlumpiyu.
9 “Ne kegkepasad dutun, tiǥuma nu is tivuuk he keet-etawan te Israel ne ipehinungud niw is menge kevuwazan ni Levi ziyà te egkesineruwan duen te Tulda he Edtelevukaayan.
10 Dumaha nu is menge kevuwazan ni Levi ziyà te etuvangan ku ne ipezampè nu te menge Israilihanen is menge ulu te menge kevuwazan ni Levi.
11 Si Aaron is ebpehinungud kandan diyà te etuvangan ku he ispisyal he halad puun te menge Israilihanen, su wey zan mekepenilbi kedì.
12 “Ne idampà te menge kevuwazan ni Levi is menge velad dan diyà te ulu zuen te zezuwa he turiti he vaka he para kedì. Is sevaha zutun, pemuhat he para idlumpiyu, ne is sevaha pa, pemuhat he edtutungen, su wey zan mevelukasi te menge salè dan.
13 Ne ipehitindeg sikandan diyà te etuvangan ni Aaron wey te menge anak din he menge maama ne ipehinungud sikandan he ispisyal he halad para kediey.
14 Pinaaǥi kayi igkesivey nu is menge kevuwazan ni Levi puun te zuma he menge Israilihanen ne egkehimu en sikandan he menge ǥaked ku.
15 “Emun egkepasad nu en te edlumpiyu wey ebpehinungud kayi te kedì he ispisyal he halad is menge kevuwazan ni Levi, ne ebpekepenilbi en sikandan diyà te Tulda he Edtelevukaayan.
16 Iyan sikandan menge Israilihanen he insivey para zà kediey he ilis te langun he kinekekayan he menge anak te menge Israilihanen.
17 Su kediey is langun he kinekekayan he menge maama te menge Israilihanen, etew man etawa uyaǥen. Hein mibpenhimetayan ku is langun he kinekekayan he menge anak he maama te menge Ehiptohanen, insivey ku en he para kediey is langun he menge anak he maama te menge Israilihanen.
18 Ne migkuwa ku is menge kevuwazan ni Levi he ilis te langun he kinekekayan he menge maama te menge Israilihanen.
19 Diyà te langun he menge Israilihanen, iyan is menge kevuwazan ni Levi mibpilì ku he ebpekeuǥup ki Aaron wey te menge anak din. Ebpenilbi sikandan diyà te Tulda he Edtelevukaayan para te menge Israilihanen, ne iyan sikandan ebaal te menge tulumanen he para mevelukasi is salà te menge Israilihanen, su para wazà kezeetan he egkehitavù kandan emun ed-uvey zan duen te Tulda he Edtelevukaayan.”
20 Umbe, mibeelan eni Moises, Aaron, wey te tivuuk he keet-etawan te Israel is insuǥù te Nengazen ki Moises he ebeelan diyà te menge kevuwazan ni Levi.
21 Midlumpiyuwan te menge kevuwazan ni Levi is keugelingen dan, wey mibpìpian dan is menge visti zan. Ne impehinungud sikandan ni Aaron diyà te etuvangan te Nengazen he ispisyal he halad, ne mibeelan ni Aaron is tulumanen he para mevelukasi is menge salè dan, wey para meisip en sikandan he lumpiyu.
22 Ne kegkepasad dutun, nenilbi en is menge kevuwazan ni Levi ziyà te Tulda he Edtelevukaayan he zizalem te kedumala ni Aaron wey te menge anak din. Mibeelan dan diyà te menge kevuwazan ni Levi is insuǥù te Nengazen ki Moises.
23 Migkaǥi is Nengazen diyà te ki Moises te,
24 “Iyan heini menge sulunuzen para te menge kevuwazan ni Levi: Ebpuun ebpenilbi is menge kevuwazan ni Levi ziyà te Tulda he Edtelevukaayan emun 25 en is penuiǥen dan,
25 ne ed-engked dan he ebpenilbi emun 50 en is penuiǥen dan.
26 Egkehimu pa sikandan he ed-uǥup te menge zuma zan he menge Levihanen pinaaǥi te kebantey zuen te Tulda, piru kenè dan en mebaal te menge vuluhaten dutun te Tulda. Iyan heeyan menge ketengdanan te menge kevuwazan ni Levi he ipetuman nu kandan.”