9
1 Hein nehuna he vulan te ikezuwa he tuig puun te kegawas te menge Israilihanen diyà te Ehipto, migkeǥiyan te Nengazen si Moises diyà te sibsivayan he Sinai te,
2 “Ibpesilibra te menge Israilihanen is Pista te Kedlavey te Belinsuǥuen dutun te timpu he midtelaan.
3 Ebpuunan niw heini emun egkesakep en dutun te ike-14 he andew kayì he vulan. Kinahanglan he ed-ikulen niw is langun he sulunuzen mehitenged kayi he pista.”
4 Umbe, migkeǥiyan ni Moises is menge Israilihanen bahin te kedsilibra te Pista te Kedlavey te Belinsuǥuen.
5 Mibeelan dan is kedsilibra zutun diyà te sibsivayan he Sinai hein mibpuun is ike-14 he andew te egkehuna he vulan. Mibeelan heini te langun he menge Israilihanen sumalà te insuǥù te Nengazen ki Moises.
6 Piru zuen duma kandan he wazà meketampu zutun te pista, su geina te zutun he andew nehimu sikandan he meremerik su nekeǥawed dan te minatey. Umbe zutun he andew midhendiyà sikandan te ki Moises wey ki Aaron.
7 Ne ke sikandan te, “Nehimu key he meremerik su nekeǥawed key te minatey, piru maan is indawey kenami is kedsilibra kayì he pista wey kebpemuhat te menge pemuhat diyà te Nengazen duma te zuma he menge Israilihanen kayi te midtelaan he timpu?”
8 Midtavak sikandan ni Moises te, “Taǥad kew zà dèpa taman te egketuenan ku ke hengkey is idsuǥù te Nengazen kediey mehitenged keniyu.”
9 Migkeǥiyan te Nengazen si Moises te,
10 “Keǥiyi nu is menge Israilihanen he minsan hentei kandan guntaan wey is huziyan he menge kevuwazan dan he egkehimu he meremerik su nekeǥawed te minatey etawa ziyà sikandin te hipenawan dutun te timpu te kedsilibra, ebpekehimu ǥihapun he edsilibra te Pista te Kedlavey te Belinsuǥuen.
11 Silibraha zan heini emun edlavey en is senge vulan, puun te ike-14 he andew te ikezuwa he vulan. Keena zan is kerehidu wey supas he wazè din tapey wey mepait he menge pinemula.
12 Kinahanglan he egkaamin heini te kenè pa egkepawà, wey kenè dan daan bedtìa is tulan duen te kerehidu. Emun edsilibra zan te Pista te Kedlavey te Belinsuǥuen kinahanglan he ed-ikulen dan is menge sulunuzen mehitenged kayi.
13 “Piru is etew he lumpiyu wey wazà medhipanew ziyà te meziyù he wazà medsilibra te Pista te Kedlavey te Belinsuǥuen, heeyan he etew kinahanglan he kenè en egkilelaan he zuma niw, su wazà sikandin mebpemuhat te pemuhat he para te Nengazen dutun te midtelaan he timpu. Heeyan he etew egkerasey tenged te salè din.
14 “Emun duen kenà Israilihanen he mid-amur ziyà te inged niw he egkesuat he edsilibra te Pista te Kedlavey te Belinsuǥuen, kinahanglan he edsilibrahan din heini he ed-ikul zuen te langun he menge sulunuzen mehitenged kayi. Neked-iring dà is menge sulunuzen he para te menge Israilihanen wey te kenà menge Israilihanen.”
Is Gapun diyà te Tulda he Ed-ezapan
(Exodus 40:34-38)
15 Hein andew te kebenguna zuen te Tulda he Ed-ezapan he zutun itaǥù sikan is Kesuǥuan, neliǥuy heini te ǥapun. Puun te mezukilem taman te meselem, heini he ǥapun henduen be te hapuy he ed-anlag.
16 Iyan heini layun egkehitavù–emun maandew ebpekeliǥuy heini zuen te tulda ne emun mezukilem ed-anlag heini iring te hapuy.
17 Ne emun ebpeketikang sikan is gapun diyà te zivavew zuen te Tulda ne egenat heini, ne egenat daan is menge Israilihanen, ne ke hendei ebpundu haazà is gapun ne zutun dan daan egkampu.
18 Umbe, midhipanew wey migkampu is menge Israilihanen sumalà te insuǥù kandan te Nengazen. Kenè dan edhipanew emun dutun pa te zivavew te tulda sikan is gapun.
19 Minsan meluǥayad he timpu is kenà ked-awà duen te ǥapun diyà te zivavew zuen te Tulda, ne kenà sikandan egenat; edtaǥad sikandan te idsuǥù te Nengazen.
20 Duen timpu he egkepipira zà he andew is kenà ked-awà duen te ǥapun diyà te zivavew zuen te tulda ne egkepipira zà daan he andew is kenè dan kebpekeǥenat. Ne edhipanew en maan sikandan sumalà te idsuǥù te Nengazen.
21 Usahay sengekezukileman dà is kenà ked-awà duen te ǥapun, ne sunud he andew ne ebpeketikang en heini, ne egenat en daan is menge Israilihanen. Maandew etawa mezukilem egenat is menge Israilihanen basta ebpezivavew haazà is gapun.
22 Emun kenà ed-awà haazà is gapun diyà te zivavew zuen te tulda seled te zezuwa he andew etawa senge vulan etawa senge tuig, kenà daan ed-awà is menge Israilihanen diyà te kampu zan, iyan, emun ebpezivavew haazà is gapun ne segugunè dan egenat.
23 Umbe, egkampu wey egenat is menge Israilihanen sumalà te idsuǥù te Nengazen. Ne midtuman dan is menge suǥù te Nengazen he migkaǥi zin diyà te ki Moises.