15
Is menayù he kedtavak, ebpekepevehew te pauk, iyan, is hangger he kedtavak, ebpekepeiseg te pauk.
Emun egkezineg te menge etew is menge lalag te uluwanen, egkesuat dan he mebmetau, piru is edlelaǥen te menge tulebung pudu zà tinulebung.
Egkaahà te Nengazen is minsan hendei. Egkeehè din is ed-ul-ulahan te minsan hentei, metazeng etawa lalung.
Is lalag he menayù, ebpekepayùpayù te gehinawa, iyan, is menge lalag he ebpekelimbung, ebpekaawà te kezasig.
Is taleng he etew ne kenè din ebpezumdumahan is penurù te amey zin, piru is uluwanen mulà, ebpemineg te ibpenurù kandin.
Duen dekelà he ketiǥeyunan te menge metazeng diyà te valey zan. Ne is egketiǥeyunan te menge lalung, ebpekeveǥey kandan te samuk. Edseysayen te menge uluwanen is ketau; kenà heini egkeveelan te menge tulebung.
Egkeepesan te Nengazen is pemuhat te menge lalung, piru igkesuat din mulà is menge kebpengemuyù te menge metazeng.
Egkeepesan te Nengazen is etew he ed-ulaula te mezaat, piru ebmahalen din mulà is ebpeninguhà he mekeulaula te metazeng.
10 Utew merasey is ibmansu te etew he ed-engked he ed-ulaula te meupiya, ne is kenà ebpezawey, iyan egkepengkusan din is kemetayen.
11 Kenà ebpekeeles diyà te Nengazen is egketagu diyà te isip wey ǥehinawa te minsan hentei su minsan is egkengeulaula ziyà te iveyaan, ne netuenan din.
12 Is etew he sumpalit, kenà egkesuat he ebpenuruen ne kenà sikandin ebpekisambag diyà te metau.
13 Emun duen kelipey ziyà te ǥehinawa te etew ne ebpekeǥemen sikandin, iyan, emun mesakit is gehinawa zin ebmerembunut is kebuvuked din.
14 Is etew he pereudseb, ebpenigudu wey meumani is netuenan din, iyan, is tulebung, kenè en mulà ebpeninguhà he mebmetau sikandin.
15 Is menge pubri layun edlised, piru emun egkekuntintu zan ne layun dan egkelipey.
16 Deyzey pa is etew he zeisey zà is ketiǥeyunan din, iyan, edtahud sikandin te Nengazen kenà is etew he zekelà is ketiǥeyunan din, iyan, layun egkesemuki.
17 Deyzey pa is menge etew he lumbey zà is sezè dan, iyan, egiǥineǥawè dan, kenà is menge etew he usa is sezè dan, iyan, ebpekunkuntedehè dan.
18 Is etew he melemu egkepauk, egkehimu he hinungdan te kesevaan, iyan, is etew he mepelevayen, ebpekehusey te egkesavà.
19 Layun edlised is etew he tepulan, iyan, is etew he metandang is ulaula zin, kenà mulà edlised.
20 Is anak he metau, igkelipey te amey zin, iyan, is anak he tulebung, edsaweyen din is iney zin.
21 Is etew he kenà meudseb, igkelipey zin is ketutulebungi zin, iyan, is etew he meudseb, layun hustu is ed-ul-ulahan din.
22 Egkehimu he kenè ta egkekuwa is ebpelenuwan ta te egkuwa emun wazà ebpekesambag kenita te meupiya he paaǥi, iyan, emun mahabet is ebpekesambag kenita ne egkekuwa ta.
23 Igkelipey te etew emun egkeisip din is hustu he kegkeǥiya te egkeǥiyen din, lavew en ke egkekaǥi zin haazà diyà te hustu he timpu te kegkeǥiya zuen.
24 Is etew he metau, iyan ed-ikulen din is dalan pehendiyà te untung ne kenà iyan is dalan pehendiyà te kemetayen.
25 Edrundusen te Nengazen is baley te etew he mepelevawen, iyan, edtipiǥan din mulà is menge azen te valu.
26 Igkeepes te Nengazen is ked-isip-isip te lalung, piru igkesuat din mulà is ked-isip-isip te metazeng he etew.
27 Is etew he leǥezen, egkesemukan is pemilya zin tenged kandin, ne is etew he kenà ebpesipsip, edluǥeyazan te umur.
28 Is etew he metazeng, edtimtimbangen din edhuna a ziyà te isip din ke hengkey is idtavak din, iyan, iburaswang mulà te etew he lalung is mezaat he menge lalag.
29 Meziyù is Nengazen te menge lalung, piru uvey sikandin te menge metazeng, su ebpemineǥen din is kebpengemuyù dan.
30 Ebpekelipey is kebpenggemenggemen, ne is meupiyè he tudtul ebpekezasig.
31 Is etew he ebpemineǥen din wey edewaten din is sawey kandin su wey mebmeluǥayad is untung din, ne ebpekaamur sikandin te menge metau.
32 Is etew he kenè din idtetenged is penurù kandin pinaaǥi te kedsewaya kandin, iring te iyan dà sikandin mezesen he edsudì te keugelingen din. Iyan, emun ebpemineg sikandin te penurù, ebmetau sikandin.
33 Is kedtehuza te Nengazen iyan ebpekepenurù kenita wey ki mebmetau, ne kenè ki egkezeliǥan emun ebpelavew ki.