16
1 Is etew, edhimu te menge pelanu, piru is Nengazen, iyan ebayàbayà te langun.
2 Is langun he ed-ul-ulahan te etew, midtuuwan din he hustu, piru edsusiyen te Nengazen is tuyù te uman sevaha.
3 Isarig nu ziyà te Nengazen is minsan hengkey he ed-ul-ulahan nu, ne egketuman nu is menge pelanu nu.
4 Is minsan hengkey he ebeelan te Nengazen ne zuen din tuyù dutun, ne netuenan din ke keenu zin edtepusa, ne is imbanglis diyà te lalung he menge etew iyan is kezeetan.
5 Egkeepesan te Nengazen is menge mepelevawen, ne siguradu edsilutan din sikandan.
6 Emun mahal ta is Nengazen he metinumanen, ebpeseyluwen din is menge salè ta. Emun edtehuzen ta sikandin, egkelikayan ta is mezaat he egkeulaula.
7 Emun igkesuat te Nengazen is menge ulaula ta, edhimuwen din he meemiǥu ta is menge kuntada ta.
8 Deyzey pa is deisey he ketiǥeyunan he meupiya he paaǥi is kegketiǥeyuni zuen, kenà is dekelà he ketiǥeyunan he netiǥeyunan pinaaǥi te limbung.
9 Pinaaǥi te isip te etew edhimuwen din is pelanu zin piru iyan egiya kandin is Nengazen.
10 Emun edhukum is hadì he egiyahan te Megbevayà, layun hustu is kukuman din.
11 Kenà igkesuat te Nengazen emun edlimbung ki is ebpetiǥayun.
12 Igkeepes te menge hadì is mezaat he vaal su iyan man ebpekelig-en te ginhedian dan is ketazeng.
13 Ebpekepenunuat te menge hadì is etew he kenà teruen, ne zekelà is kedtahud dan kandin.
14 Dekelà is keǥehem te hadì umbe emun egkepauk sikandin egkehimu he edhimetayan din is egkepeukan din, ne iyan ebpekepayùpayù kandin is etew he metau.
15 Emun nekepenunuat te hadì is etew ne kenè din sikandin edhimetayan; ibpeehè din kandin is keupiya zin he iring te uzan he ebpekepetuvù te menge pinemula.
16 Meupiya pa he egkaangken is ketau wey kedsavut kenà is bulawan wey pelata.
17 Is etew he metandang is menge ulaula zin edlikey te mezaat, ne is ebentayan din is keugelingen din ebpekelikey te kezeetan.
18 Is kebpelavew wey kegkemesinupaken, edrimeǥas te kezeetan.
19 Deyzey pa is kenà kebpelavew wey kegkeey-eyuwi kenà is kebpelavew wey kebpekaangken te menge azen pinaaǥi te ked-aǥew.
20 Is etew he ebpekeventayan din is penurù, ed-uswag sikandin, ne utew zeyzey is etew he edsarig te Nengazen.
21 Is etew he uluwanen, egkekilala he metau he edsavut, ne emun metau he edlalag ne ebpekeistudyu is duma ziyà te kandin.
22 Is kegkesevuta te hustu, iyan ked-isipa zuen te menge pereudseb is iring te tudà te wahig he ebpekeveǥey te untung su ebpekepeluǥayad te untung te etew, iyan, is tinulebung he menge vaal, iyan igkesiluti te menge tulebung.
23 Is uluwanen he etew, edhuna ebpurung ed-isip-isip ne human egkaǥi, umbe utew egkesuati te ebpemineg is ibpenurù din.
24 Is menge lalag he meupiya he ebpemineǥen, ne iring te teneb is kegedgezama ta zuen diyà te ǥehinawa ta ne ebpekevawì kenita.
25 Duen dalan he kunaan te etew ke meupiya he ed-ikulen, iyan, diyè bes ebpekepevayà te kemetayen.
26 Is edsuhulan, edterebahu su wey mevewii is kegkevitil zin.
27 Is engey he etew, iyan pelanu zin is ked-ulaula te mezaat, ne is menge lalag din ebpeketutung iring te hapuy.
28 Is etew he mezaat is kebpemèbè din, ebpeketuvù te samuk wey egkehimu he hinungdan te kebpekegkuntedaha te teleemiǥu.
29 Is etew he mesipala, egkelimbungan din is duma zin pinaaǥi te pesarig din, ne egkeuwit din diyà te kezeetan.
30 Is ebpurung dà ebpengpengendat, lagmit mezaat is ed-isipen din, ne is ebpurung dà ebpenggemen-gemen, lagmit daan mezaat is tuyù din.
31 Utew meupiya emun egkembuwayan ki taman te ked-indelawi te vulvul ta, ne ziyè heeyan egkeulaula te etew he metazeng.
32 Deyzey pa is etew he mepelevayen, kenà is etew he veǥani; deyzey pa is etew he ed-eǥenen din is pauk din, kenà is ebihag te sengeingezan.
33 Ebarà is etew su wey zin metueni is dait he ed-ul-ulahan din piru iyan is Nengazen ebpuunan te minsan hengkey he penurù he zait he ed-ul-ulahan.