22
1 Is meupiya he zengeg lavew pa he meupiya he ebpilien kenà is dekelà he ketiǥeyunan. Is kedtehuza kenita te menge etew ne lavew pa he meupiya kenà is kegkeengkena ta te pelata wey vulawan.
2 Is sepian wey pubri pudu midlimbag te Nengazen.
3 Is etew he uluwanen, egketuenan din te edlikey emun duen kemereǥenan he ebpekesuǥat kandin, iyan, is etew he wazè din utew emet ne kenà ed-eliǥu zutun, umbe ebpekebmereǥen sikandin.
4 Pinaaǥi te kenà kebpelavew te etew wey te kedtehuza zin te Nengazen, egkehimu he egkaangken din is dekelà he ketiǥeyunan, meupiya he zengeg, wey keluǥayad te untung.
5 Is ibayà te lalung he menge etew, ne iring te zalan he zuǥiyen wey zuen duen menge litag. Is etew he ebpekeziyù keniyan he zalan ne ed-empingan din is untung din.
6 Kinahanglan he ibansey ta ziyà te menge vatà is menge ulaula, he zait he ed-ul-ulahan, ne emun ebmeǥurang en sikandan, ne kenè dan edsuwey zutun.
7 Is menge egkengaayuayu ne egkeveyveyaan te menge sepian, ne is menge ebpengutang uripen te menge neutangan dan.
8 Is ebpemula te kelelalung ebpekeraǥun te kezeetan, ne kenè en ebpekependezaat te zuma.
9 Edtuvazan te Nengazen is etew he kelelaǥan, su edtelewizen din is menge pubri.
10 Emun ibpaawà diyà te inged is menge etew he sumpalit, egkaawà daan is kebpelewlewanà, kesevaan, wey is kebpein-insultuwà.
11 Is etew he lumpiyu is gehinawa zin wey menayù is kebpengaǥikaǥi zin ne egkehimu he emiǥu te hadì.
12 Ebpurungan ebentayi te Nengazen is menge uluwanen, piru edezeetan din is menge pelanu te menge teruen.
13 Mezakel is menge pesangil te tepulan. Kenè kun sikandin egawas su zuen kun erimaung diyà te ǥawas he edawi kandin.
14 Is kegkaǥikaǥi te vahi he lebag ne ebpeketintal, iring te mezalem he vudsi, ne heini he vudsi ne egkeulug kayi is egkeepesan te Nengazen.
15 Kineiya te vatà is kelelalung, piru egkaawà heeyan diyà te kandin pinaaǥi te kebmensuwa kandin.
16 Egkepubri is etew he edèdaaǥen din is egkeey-eyuwan su wey meumani is ketiǥeyunan din etawa iyan din ebegayan is sepian.
Is menge Erubasa te Uluwanen
17 Heini is menge lalag te uluwanen he menge etew. Pemineǥa nu heini purungi zutun te kebpenurua ku kayi kenikew,
18 su ebpekeveǥey heini kenikew te kelipey emun kenè nu heini egkelipatan.
19 Ibpenurù ku heini kenikew ǥuntaan su wey nu iyan meseriǥi is Nengazen.
20 Insurat ku is 30 he menge erubasa he ebpekeveǥey te ketau wey menge selembaǥan.
21 Pinaaǥi kayi egketuenan nu ke hengkey is hustu, ne ebpekeveǥey ka te egkeseriǥan he menge tavak diyà te menge etew he ed-insà kenikew.
-1-
22 Kenè ka pemintahà te menge pubri, wey kenè nu sikandan pegpeǥesa ziyà te hukmanan,
23 su is Nengazen iyan edlavan kandan. Emun hengkey is ebeelan niw ziyà te kandan he kenà meupiya ne iyan daan ebeelan te Nengazen diyà te keniyu.
-2-
24 Kenè ka mebpekid-emiǥu te etew he melemu egkepauk,
25 su kela ke mekeiring ka kandin, ne egke-uwit-uwit ka zutun he kineiya.
-3-
26 Kenè ka mebpesarig he iyan ka ebayad te utang te zuma.
27 Su emun kenè ka ebpekevayad, egkuwaan dan is hizeǥaan nu.
-4-
28 Kenè nu ihalin is taltal te tanè nu, he iyan kes taltal he intaltal te menge apù nu.
-5-
29 Is etew he metau he ebaal te edterebehuwen din ebpekepenilbi te hadì ne kenè diyà te menge etew zà duen.