23
-6-
1 Emun egkaan ka zuma te pengulu, purungi nu is kebpenwalengwaleng nu.
2 Emun buleǥuk ka, ne kenè nu pezumdumahi is gehinawa nu.
3 Kenè ka meima te meupiya he menge keenen he indtangel zin, su kela ke igezam din dà te ulaula nu.
-7-
4 Kenè nu pesubrahi is kedhaǥù nu tenged te kedtinguhà he medsepian ka. Kekenà, pugungi nu is keugelingen nu ne is-isipa nu ke hengkey is hustu.
5 Is selapì, ne egkehanew te senge perè dà he iring te zuen din pakpak he edlayang pehendiyà te meziyù iring te vanug.
-8-
6 Kenè ka megkaan etawa meima te keenen te etew he kuriput, minsan meupiya pa heini.
7 Su is etew he iring keniyan, ebelensiyen din is kezekelà te egkekaan nu. Ke sikandin, “Pengaan ka.” Piru kenè bes ebpuun diyà te meupiya he ǥehinawa zin is kegkekeǥiya zin dutun.
8 Umbe, kenè ka penigudu kaan su egkeutè nu is nekaan nu ne egkaawè is pulus te kedeliǥa nu kandin.
-9-
9 Kenè ka mebpekidlalag te menge tulebung, su minsan metau ke pa he ed-lalag wazà pulus gihapun kayi ziyà te kandan.
-10-
10 Kenè nu eǥawa is tanà te menge ilu pinaaǥi te kedhelina te menge kezaan he menge simintu kayi.
11 Su is Nengazen iyan mekeǥeǥehem he edlavan kandan. Iyan sikandin ebpengalang kandan kuntra kenikew.
-11-
12 Pemineg ka emun ebpenuruen ka su wey ka mebmetau.
-12-
13 Kenè ka mebpeneǥana he ebmansu te anak nu. Su is kedlegkuta nu kandin ne kenè din ibpatey,
14 kekenà, iyan idluǥeyazi kandin te untung.
-13-
15 Mama, melipayen a emun uluwanen ka,
16 wey hustu is menge lalag nu.
-14-
17 Kinahanglan he kenè ka egkesina te menge mekesesalà, kekenà, tehuza nu layun is Nengazen.
18 Su emun edtehuzen nu sikandin, tutuu iyan he zuen meupiya he egkeperateng nu; kenà egkehimu he wazà pulus te menge tinguhè nu.
-15-
19 Mama, pemineǥa nu is egkeǥiyen ku. Penigudu ka wey ka mehimu he uluwanen ne isipa nu is hustu he ed-ul-ulahan.
20 Kenè ka mebpekiduma te menge lelenguten wey vuleǥuk,
21 su heeyan he kelasi te menge etew ne melemu he egkepubri. Edtulung dan dà ebpenlipezeng, umbe iyan egketemanan dan is ebpekekukumbalè dan dà te tuǥak.
-16-
22 Pemineǥa nu is ginikanan nu he iyan mid-uyag kenikew ne kenè nu iyan dà ivaras kandan is bà nu zà edsudia emun ebmeǥurang dan en.
23 Peniguduwi nu he maangken nu is ketutuanan, ketau, kegkemansu, wey kedsavut. Ne kenè nu heini iliwà te minsan hengkey he menge azen.
24 Utew igkelipey te ǥinikanan nu emun metazeng ka wey uluwanen ka,
25 lavi en is iney nu.
-17-
26 Mama, pemineǥa nu purungi is egkeǥiyen ku, ne sunuza nu is menge ulaula ku.
27 Is bahi he ebelegyà te zengeg din, ne ebpekezezaat kenikew. Iring heini te mezalem he vitu wey meliǥet he vudsi.
28 Iring sikandin te tulisan he edtaǥad te egkebiktima zin, ne iyan sikandin hinungdan te kedlseselai te menge maama te menge esawa zan.
-18-
29-30 Hentei is mekehizuhizu he etew, peretebek, riklemedur, melemu he egkengepelian, wey layun dà meriǥà is mata zin? Iyan heini sikan is etew he lelenguten, he egkesuat layun he egezam te nekedselekawà he inumen.
31 Kenè ka petintal te keriǥa wey ked-ilak-ilak te vinu ziyà te seled te vasu wey is ketaam kayi he ed-inumen.
32 Su emun egkelangut ke en, ne selakew en is egkeǥezam nu te lawa nu, iring te edhereg he uled he egkaǥat kenikew.
33 Ne minsan hendei ke zà meketengteng, ne kenà meupiya is ked-isip-isip nu.
34 Henduen be te ziyè ka medhizeǥà te varku he ziyà te lawed te zaǥat.
35 Ne egkeisip nu is: “Midsusumbag a, iyan, wazà a mevuǥel, midlelagkut a iyan, wazè ku ǥezama. Keenu ad buwa egkehuwasi su wey a mekeuman en maan mekeinum?”