7
1 Mama, layun nu tumana is menge lalag ku ne kenè nu lipati is menge suǥù ku.
2 Tumana nu is menge suǥù ku ne edluǥeyazan ka te untung. Ne pekeventayi nu is menge penurù ku iring te ked-urami nu te mata nu.
3 Ipemula nu heini ziyà te isip nu wey nu kenà melipati.
4 Is ketau, isipa nu he iring te etevey nu, ne is kedsavut, isipa nu he iring te utew nu emiǥu.
5 Tenged kayi egkelikayan nu is bahi he edsalàsalà te esawa zin, wey te mekevivihag he menge lalag dan.
Is Bahi he Mengungumpadi
6 Diyà te valey ku zuen timpu he midsulew a,
7 ne neehè ku is menge vetan-en he menge maama he wazè dan pa utew pereg, ne nesusi ku he is sevaha kandan egketalengtaleng.
8 Midhipanew sikandin pehendiyà te suyuk he zutun kes ed-ubpaan te sevaha he vahi he mengungumpadi.
9 Mahapun en dutun ne malù en ebmerusirem.
10 Ne midsinuǥung sikandin te vahi he mibivisti te iring te visti te vahi he ebelegyà te zengeg din, ne zuen din mezaat he pelanu.
11 Berèbaan heini he vahi ne wazè din keelezan. Ne layun en sikandin wazà diyà te valey zin.
12 Ed-ayan sikandin diyà te menge kelesada, etawa ziyà te kada suyuk, wey ziyà te menge pelasa.
13 Migkepkepan din sikan is maama, ne midhezekan din. Ne wazè en sikandin menawànawà is egkaǥi te,
14 “Midtuman ku ǥeina is penangdù ku ziyà te Nengazen he ebpemuhat a, umbe zuen usa ziyà te valey.
15 Umbe, mibpen-ehè ku sikew, ne meupiya su neehè ku sikew.
16 Daan ku en he mibpurungi te edempas is hizeǥaan ku te dikulur he manggad he linu he ebpuun diyà te Ehipto.
17 Mibpehemutan ku en te menge pehemut he mira, aloe, wey sinamun.
18 Ne hendiyè ki en, su ebpehulizà ki; ebpemulpulusan ta is kebpeked-eriǥè ta taman te egkepawà,
19 su is esawa ku ne wazà diyà te valey. Meziyù is midhipenawan din.
20 Dekelà is selapì he mid-uwit din ne edlavey pa is dezuwa he simana ne human sikandin ebpekeulì.”
21 Pinaaǥi te keungangen te menge lalag din neuwit din haazà is maama.
22 Segugunà sikandin miduma zutun te vahi, ne iring sikandin te tudu he vaka he eduma te edtuyuk kandin pehendiyà te lugar he zutun edlepaa, wey iring te selazeng he ebpetandang en diyà te litag
23 he zutun edhimetayi pinaaǥi te panà. Iring daan sikandin te sevaha he tagbis he edhendiyè en te litag, wazè din metueni he kemetayen en bes is egkepengkusan din.
24 Umbe, ǥuntaan menge anak, purungi niw pemineǥa is egkeǥiyen ku.
25 Likayi niw is bahi he iring dutun, ne kenè kew peuwit kandin.
26 Mahabet en he menge maama is nengezeetan tenged kandin.
27 Emun ebpehendiyè kew te valey zin, ne henduen be te mid-ikul niw is dalan pehendiyà te kemetayen.