8
Kedeliǥa te Ketau
1 Is ketau wey is meupiya he kedsavut iring te etew he edwali.
2 Edhithitindeg sikandin diyà te metikang he menge lugar ziyà te kilid te zalan, diyà te menge suyuk,
3 wey ziyà te menge ǥemawan te inged, wey ziyà te menge veyeey. Ne ebpengumew sikandin te,
4 “Sikiyu is langun he menge etew, edlelaǥan ku sikiyu.
5 Sikiyu is menge wazè din utew hanew, penigudu kew wey kew mebmetau.
Sikiyu is menge tulebung, gemita niw is kedsavut niw.
6 Pemineg kew su zekelà is pulus wey hustu heini is egkeǥiyen ku.
7 Egkaǥi a te tutuu, su egkeepesan ku is kegkaǥi te mezaat.
8 Tutuu is langun he egkeǥiyen ku; wazà tarù wey limbung he menge lalag ku.
9 Is etew he zuen din kedsavut, ne utew zin egkekeleduwi is langun he menge lalag ku, ne wazà igkesawey zin duen.
10 Ne isipa niw he lavew pa he mahal is penurù ku kenà te pelata, ne isipa niw zaan he lavew pa he mahal is ketau kenà te pinilì he vulawan.
11 Su is ketau mahal pa kenà is mahalen he menge vatu, ne wazà minsan hengkey he egkesuatan te etew he ebpekerepeng kayi.
12 Siak, is ketau, metau he ed-isip-isip ke hendei is hustu etawa kenà, wey netuenan ku ke ebmenmenuwen te ed-angken is ketau wey kedsavut.
13 Is langun he edtahud te Nengazen, igkeepes dan is mezaat. Egkeepesan ku is kegkegelbuwen, is kegkemepelevawen, is mezaat he menge vetasan, wey is winalì he menge lalag.
14 Metau a he edsambag, duen ku hustu he ketau. Duen ku meupiya he kedsavut wey ǥehem.
15 Pinaaǥi kediey ebpekezumala is menge hadì, wey edhimu is menge pengulu te metazeng he menge kesuǥuan.
16 Ne pinaaǥi zaan kediey ebpekezumala is langun he metazeng he ebpemendumala wey menge upisyal.
17 Ebmahalen ku is mibmahal kediey,
ne is ebpen-ahà kediey egketuredu e zin.
18 Ebpekeveǥey a te ketiǥeyunan, dengeg, keuswaǥan wey kezeeǥan he kenà egkahanew.
19 Is keupiyaanan he egkekuwa te etew he nekaangken kedì, mahal pa kenà is kuruna he vulawan etawa pelata.
20 Edsunuzen ku is metazeng wey is hustu.
21 Is mibmahal kediey ebeǥayan ku te ketiǥeyunan;
ebpenuen ku is teleǥuey zan te ketiǥeyunan.
22 Puun pa te puunà, daan e en dutun te wazè pa limbaǥa te Nengazen is langun.
23-26 Impelastar e zin en puun pa te puunà.
Daan e en dutun te wazè pa is kelibutan: is daǥat, is menge serebseb, is menge vuntud, is menge vuvungan, is menge vevesukà, wey minsan pa is menge eliyavuk.
27 Daan e en hein midlimbag din is langit.
Daan e en hein insavuk din is mid-elangan te langit wey tanà.
28 Daan e en hein midhimu zin is gapun,
wey is menge ulu te wahig diyà te kinezizeleman,
29 hein midteltalan din is egketemanan te zaǥat su wey kenà medlapey,
wey hein insavuk din is menge pundasyun te kelibutan.
30 Hein mibpelanu wey mibpundar is Nengazen te langun kayi, diyà a is ketau te avey zin.
Iyan a igkelipey zin kada andew, ne layun a melipayen diyà te etuvangan din.
31 Ingkelipey ku is kelibutan he midlimbag din, wey is menusiyà.
32 Umbe ǥuntaan menge anak, pemineǥa a keniyu,
su utew zeyzey is edsunud te menge lalag ku.
33 Pemineǥa niw is menge penurù ku wey kew mehimu he uluwanen;
ne kenè niw heini iselikwey.
34 Utew zeyzey is etew he layun ebantey wey edtaǥad su wey mekepemineg kedì.
35 Is etew he ebpen-ahà kedì ne ebpeketuredu te untung,
ne igkesuat sikandin te Nengazen.
36 Piru is etew he wazà meketuredu kedì, edezeetan din is keugelingen din.
Ne is langun he egkeepes kedì, ne iyan dan egkesuatan is kemetayen.”