9
Is Ketau wey Ketutulebungi
1 Is ketau, iring te sevaha he etew he mibevaley te zekelà wey mekempet he valey.
2 Ne nengemuran sikandin. In-andam din is menge keenen wey menge inumen.
3 Ne midsuǥù din is menge suluǥuen din he menge vahi te kedhendiyà te metikang he menge lugar zutun te inged su wey zan ikepesayud heini:
4 “Sikiyu is menge wazà hanew wey kedsavut, mid-imbita kew te kegkaan te ǥastu.
5 Hendiyè kew wey kew mekekaan te keenen he in-andam ku, ne wey kew zaan mekeinum te vinu he inteǥana ku.
6 Kenè niw ipedayun is kedtinulebung niw ne ebmeupiya is ked-ubpè niw, ne pengungubpaan kew zuma is kedsavut.”
7 Emun edewayen nu is etew he mesudì, bà ke zin dà ed-insultuwi. Ne emun edewayen nu is lalung he etew, bà ke zin dà edsumpalita wey ed-ebusari.
8 Kenè nu zewaya is etew he mesudì su và ke zin dà egkeepesi. Iyan nu zewaya is etew he uluwanen su ebmahalen ke zin.
9 Penurua nu is etew he uluwanen ne ed-iseg pa is ketau zin. Penurua nu is etew he metazeng ne ed-iseg pa is netuenan din.
10 Tehuza nu is Nengazen wey ka mekaangken te ketau. Kilelaa nu is Waǥas he Megbevayà ne egkeangken nu is meupiya he kedsavut.
11 Pinaaǥi te ketau ebmeluǥayad is untung.
12 Emun uluwanen ka, ne ebpekeveǥey kenikew te keupiyaanan, piru emun edsudien nu is ketau, ibpaantus nu zà is gehinawa nu.
13 Is ketutulebungi iring te sevaha he vahi he wazè din betasan, wazà memansu wey wazè din ketau.
14 Ebpimpinuu sikandin diyà te ǥemawan te valey zin, diyà te vangkù diyà te metikang he menge lugar zutun te inged.
15 Ne ed-umawen din is menge etew he edsaǥad he ebpemenhendiyà te menge terebahu zan.
16 Ke sikandin te, “Sikiyu is wazè din pereg wey kedsavut, hendini kew.”
17 “Is tinakew he wahig utew meupiya he ed-inumen, ne is keenen he id-eles is kegkeena zuen ne utew metaam.”
18 Piru wazà mesayud heini he menge etew he is edhendiyà te kandin ebpatey. Is nekehendiyè en te kandin diyè en te iveyaan.