103
Is Gaǥew te Nengazen
1 Ereg he edeliǥen ku is Nengazen.
Edeliǥen ku is kegkewaǥas din seled te tivuuk he untung ku.
2 Ereg he edeliǥen ku is Nengazen,
ne kenè ku edlipatan is keupiya zin.
3 Mibpesaylu zin is langun he menge salè ku,
wey neulian is langun he menge zaru ku tenged te kebewii zin kedì.
4 Midlibri e zin te kemetayen,
ne midtuvazan e zin tenged te kebmahala zin wey kegkehizuwi zin kedì.
5 Kayi te kebpengungubpaan ku, mahabet is menge keupiyaanan he imbeǥey zin kedì,
ne mezesen a iring te vanug su henduen be te kenà egkaawà kayi te kedì is kengunguhezi.
6 Edepiǥan te Nengazen is menge edèdaaǥen emun edhukum sikandin,
ne ibeǥey zin kandan is hustu he kukuman.
7 Impezayag din diyà te ki Moises is paaǥi zin,
wey impeehè din te menge tig-Israel is mekeǥeǥehem he menge vaal zin.
8 Hihizuwen sikandin, beliǥeǥawen sikandin, ebmahal sikandin, ne kenà sikandin melemu he egkepauk.
9 Kenà ebpedayun is kedsewaya zin kenitew,
wey kenà taman te taman is pauk din.
10 Wazè kiw zin siluti te silut he zait te menge salè tew.
Wazè kiw zin belesi te sungkad te kelelalung tew.
11 Is kezekelà te mid-elangan te langit wey tanà,
ne iyan daan kezekelà te kebmahala zin te menge edtahud kandin.
12 Ke sengemenu keziyù is edsilaan diyà te edsenlepan,
iyan daan kebpekeziyua zin kenitew puun te menge salè tew.
13 Is amey hihizuwen te menge anak din,
ne iring din ded daan is Nengazen su hihizuwen te menge edtahud kandin.
14 Su netuenan din ke mibmenumenu kiw zin te ebaal.
Ne edtentenuzan din he mibeelan kiw zin he ebpuun diyà te eliyavuk.
15 Is untung tew te menge etew ne iring te sagbet.
Ed-uswag kiw wey edekelà iring te ebpengevukad he vulak diyà te sibsivayan.
16 Ne edhiyupen te keramag heini is kevukad,
ne egketazin heini ne kenè en egkaahà.
17-18 Piru wazà ketepusan te kebmahala te Nengazen te menge etew he edtahud kandin, menge edtuman te kebpekid-uyun din, wey menge edtanudtanud te kedtuman te menge suǥù din.
Ne is kebpurungi zin kandan ebpedayun pehendiyà en te menge kevuwazan dan.
19 Insavuk te Nengazen diyà te langit is pinuuwè din te kedhadì,
ne edhedian din is langun.
20 Deliǥa niw is Nengazen,
sikiyu is mekeǥeǥehem he menge velinsuǥuen he ebpemineg wey edtuman te menge lalag din.
21 Deliǥa niw is Nengazen,
sikiyu is langun he ilengiten he menge linimbag he ebpenilbi kandin wey edtuman te egkesuatan din.
22 Deliǥa niw is Nengazen,
sikiyu is langun he menge linimbag he ziyà te langun he menge lugar su zizalem heini te keǥehem din.
Ereg he edeliǥen ku is Nengazen.