104
Is Kedeliǥa te Megbevayà he Nenlimbag
1 Ereg he edeliǥen ku is Nengazen.
Nengazen he Megbevayè ku, mekeǥeǥehem ka iyan.
Is kezekelà te zengeg nu wey is kegkelavew nu, menge kineiya heini he insun-ud nu iring te visti.
2 Midtembunan nu is keugelingen nu te kerayag he henduen be te visti,
ne indempas nu is langit he henduen be te tulda.
3 Mibangun nu is ubpeey nu ziyà te zivavew pa te kewkewangan.
Ne iyan midhimu nu he menge kerwahi nu is menge ǥapun,
ne ed-untud ka he egkeuwit te keramag.
4 Midhimu nu he menge menunudtulè nu is keramag,
ne menge suluǥuen nu is menge kilat.
5 Impelastar nu is kelibutan diyà te nesevukan din,
ne kenà heini egkewaleng taman te taman.
6 Iring te manggad is wahig he intambun nu te kelibutan,
ne nesapal is menge vuvungan.
7 Tenged te mezaǥing he mandar nu mid-awà is wahig.
8 Ne midtudà heini ziyà te menge vuvungan wey menge suǥud,
wey ziyà te zuma pa he menge lugar he in-andam nu para kandan.
9 Duen menge taltal he insavuk nu para zutun dà sikandan taman,
su para kenè dan en meumani mesapal is kelibutan.
10 Ne impetudè nu is menge serebseb diyà te menge zal-ug,
ne midtudà is menge wahig diyà te pid-elangan te menge vuvungan.
11 Umbe, is langun he menge leew he langgam, ragkes en is leew he menge asnu, nekeinum kayi.
12 Ne ziyà te uvey zutun te menge wahig, midsesalag is menge tagbis diyà te subpang te menge kayu ne henduen be sikandan te ebpemenganta.
13 Ne ebpuun diyà te ubpeey nu he langit, mibpeuzanan nu is menge vuntud.
Ne tenged kayi te vaal nu nekezawat te tuvad nu is kelibutan.
14 Impetuvù nu is menge sagbet he para te menge leew wey menge uyaǥen,
wey is menge pinemula he para te menge etew su wey zan mekekaan te menge abut kayi.
15 Duen binu he ebpekelipey kandan,
duen lana he ibmesinew te zagwey zan,
wey zuen keenen he ebpekepezesen te lawa zan.
16 Nepurungan mevinyaǥi is menge kayu nu he sidru ziyà te Lebanon,
he iyan ka nenguney nemula zuen.
17 Ne zutun mebpenesalag is menge tagbis;
is menge tagbis he dugwak he ebpenesalag diyà te kayu he abitu.
18 Is leew he menge kambing diyà ebpen-ubpà te metikang he menge vuntud,
ne sikan is menge badir ziyà ebpen-eles te menge vatu.
19 Mibeelan nu is bulan he para tuus te timpu;
ne ibpesanlep nu is andew te hustu he timpu.
20 Mibeelan nu is kerusireman;
ne emun mezukilem ebpemenggawas is mahabet he menge langgam diyà te ketelunan.
21 Edhiniǥer is menge erimaung emun ebpen-ahà sikandan te egkekaan dan he inteǥana nu kandan.
22 Ne emun edsilè en is andew, ne edlikù sikandan diyà te elesè dan ne zutun dan ebpemenleku.
23 Ne is menge etew ebpemenggawas diyà te menge valey zan su edterebahu zan taman te egkesakep.
24 Nengazen, utew mahabet is mibpemeelan nu.
Mibeelan nu heini is langun pinaaǥi te ketau nu.
Nepenù is kelibutan te menge mibeelan nu.
25 Is daǥat utew subra is keluag din,
ne kenà egkevilang is menge linimbag nu he ebpen-ubpà kayi, dekelà se zeisey.
26 Ebiyahi kayi is menge varku he ebpemenlikùlikù,
ne is dragun he Leviatan he linimbag nu ne ed-en-enunung kayi te zaǥat.
27 Is langun he uuyag he menge linimbag edsarig te kebeǥayi nu kandan te keenen te timpu te kegkinehenglana zan kayi.
28 Mibeǥayan nu sikandan te egkekaan dan,
ne migkaan dan haazà ne nengahantey sikandan.
29 Iyan, ke ebey-anan nu sikandan, ne egkengehandek dan;
emun id-awè nu is gehinawa zan, ne ebpematey sikandan ne ebpekelikù sikandan diyà te tanà he iyan ebpuunan dan.
30 Egkeuyag sikandan emun ebeǥayan nu sikandan te ǥehinawa.
Iyan heini paaǥi te kebmahabet te uuyag he menge linimbag kayi te kelibutan.
31 Berakat he ebpedayun is gehem nu, Nengazen, te wazà pidtemanan.
Berakat he igkelipey nu is mibpemeelan nu.
32 Emun edtengtengan nu is kelibutan, ne egkehuyung heini.
Ne emun edsemsamen nu is buntud, ne ed-evel heini.
33 Egkentahan ku is Nengazen seled te tivuuk he untung ku.
Egkentahan ku te menge kedalig is Megbevayè ku te uuyag e pa.
34 Berakat he igkelipey zin is kebpurunga ku ked-is-isipa kayi te langun.
Igkelipey ku is Nengazen.
35 Iyan, is menge lalung wey mekesesalà edèdeetan kayi te kelibutan ne egkengahanew sikandan.
Ereg he edeliǥen ku is Nengazen.
Deliǥa is Nengazen!