107
Is Kedalig te Keupiya te Megbevayà
Peselemati is Nengazen, su meupiya sikandin;
wazà pidtemanan te ǥaǥew zin.
Keǥiya niw heeyan, sikiyu is midlibri zin te kezeetan he ebeelan te menge kuntada niw.
Su midtigum kew zin puun te menge tanà diyà te edsilaan, edsenlepan, dizaya, wey zivavà.
 
Duen menge etew he nengetazintazin diyà te sibsivayan;
kenè dan egketuredu is beyeey pehendiyà te inged he egkehimu he egkeubpaan dan.
Nevitil wey nemezahan sikandan,
ne egkeǥezam dan he hapit en sikandan ebpatey.
Ne zutun te kedlised dan, mibpetavang sikandan te Nengazen,
ne midlibri zin sikandan.
Impenurù din kandan is dalan he ebpekediritsu zuen te inged he zuen duen menge meǥinged.
Ereg sikandan he ebpeselamat te Nengazen tenged te ǥaǥew zin wey te egkein-inuwan he menge vaal zin diyà te menge etew.
Su ibpemeinum din is egkengemezahan wey ibpekaan din is egkengevitil.
 
10 Duen menge etew he mibpirisu he kinedinahan,
ne ebpimpinuu sikandan diyà te utew merusirem he pirisuwan.
11 Nepirisu sikandan su midsupak dan is menge suǥù te Utew Lavew he Megbevayà,
wey wazè dan beǥayi te keveǥat is menge sambag din.
12 Umbe, midlisedlised din sikandan te meveǥat he menge terebahu.
Nengepiley sikandan ne wazà midtavang kandan.
13 Ne zutun te kedlised dan, mid-umew zan is Nengazen,
ne midlibri zin sikandan.
14 Mibpemidtew zin is ingkedina kandan,
ne in-awè din sikandan dutun te utew merusirem he menge pirisuwan.
15 Ereg sikandan he ebpeselamat te Nengazen tenged te ǥaǥew zin wey te egkein-inuwan he menge vaal zin diyà te menge etew.
16 Su mibpenggevè din is menge ǥemawan he brunsi,
wey mibpemadtì din is menge rihas he putew.
 
17 Duen menge tulebung he nekebmereǥen tenged te menge kedrapas dan wey kelelalung.
18 Wazè dan en gana te langun he keenen ne hapit en sikandan ebpematey.
19 Ne zutun te kelised dan, mid-umew zan is Nengazen,
ne midlibri zin sikandan.
20 Migkaǥi zà sikandin ne nengeulian sikandan.
Midlibri zin sikandan te kemetayen.
21 Ereg sikandan he ebpeselamat te Nengazen tenged te ǥaǥew zin wey egkein-inuwan he menge vaal zin diyà te menge etew.
22 Ereg sikandan he ebpemuhat para te kebpeselamat diyà te Megbevayà;
ne pinaaǥi te kegkanta tenged te kegkelipey ne tudtula zan is menge vaal zin.
 
23 Duen menge etew he mid-untud te menge varku,
su pinaaǥi te kebiyahi ziyà te zaǥat is igkekuwaa zan te igkeuyag dan.
24 Neehè dan is egkein-inuwan he menge vaal te Nengazen diyà te menge zaǥat.
25 Su pinaaǥi te suǥù din, mibpengeramag te mevendes ne midekelà is menge vaǥel.
26 Tenged dutun ebpehendiyà te zivavew wey ebpehendiyà te zizalem haazà is untuzè dan.
Naawà is kevurut dan tenged dutun he hitavù.
27 Henduen be sikandan te egkengelangut,
su ebpemekeziregdireg sikandan ne wazè dan en metueni ke hengkey is ebeelan dan.
28 Dutun te kedlised dan, mid-umew zan is Nengazen,
ne midtevangan din sikandan.
29 Impeengked din sikan is mevendes he keramag ne mibmelinew is daǥat.
30 Nelipey sikandan hein mibmelinew en is daǥat,
ne impeturedu kandan te Megbevayà is dungguan he iyan mibpenganduy zan.
31 Ereg sikandan he ebpeselamat te Nengazen tenged te ǥaǥew zin wey egkein-inuwan he menge vaal zin diyà te menge etew.
32 Ereg dan he ibpehivantug is Megbevayà diyà te kedtiǥum dan
wey edeliǥen dan daan sikandin diyà te kedtiǥum te ebpemendumala kandan.
 
33 Midhimu te Nengazen he disirtu is edtudà he menge wahig,
wey midhimu zin he memaza he tanà is menge serebseb.
34 Midhimu zin he wazà pulus duen te meupiya he tanà,
su ǥeina te menge lalung is nen-ubpà duen.
35 Midhimu zin he zuen menge wahig diyà te disirtu,
wey midhimu zin he menge serebseb is memaza he menge tanà.
36 Impeubpè din dutun is ebpemitilen
ne mibangun dan dutun is inged he ed-ubpaan dan.
37 Mid-ezek dan diyà te bevesukè dan wey nememula zan te paras,
ne zekelà is menge abut dan.
38 Midtuvazan sikandan te Megbevayà, ne mibmezakel zan.
Minsan is menge uyaǥen dan ne wazè din mehimuwa he medeisey.
 
39 Ne tenged te kedèdaaǥa, kebpesekiti, wey kebpeentusa kandan,
mideisey zan ne nepeel-elezan dan.
40 Mibpendezeisey te Megbevayà is menge midaagdaag kandan pinaaǥi te kedtezina zin kandan diyà te disirtu he wazà duen menge zalan.
41 Piru midtevangan din mulà is menge egkaayuayu te menge elentusen dan,
ne mibpengelinteuwan din he mevuwad is menge pemilya zan iring te menge uyaǥen.
 
42 Naahà heini te menge metazeng ne nelipey sikandan,
iyan, is langun he menge lalung ne wazè dan egkekaǥi.
 
43 Is menge uluwanen ereg he ebpurung ed-isip-isip mehitenged kayi;
ereg he ed-isipen dan is dekelà he ǥaǥew te Nengazen.