108
Ampù para te Kebuyù te Tavang te Megbevayà
(Menge Salmo 57:7-11; 60:5-12)
1 He Megbevayà, utew zekelà is kedsarig ku kenikew.
Egkentahan ku sikew te menge kedalig kayi te tivuuk he ǥehinawa ku.
2 Egkeriwaswas pa ne egimerat e en,
su wey ku maandam en is menge instrumintu ku he zuen dan menge kuwirdas para meǥamit ku te kedalig kenikew.
3 Nengazen, edeliǥen ku sikew ziyà te teliwazà te menge etew.
Egkentahan ku sikew ziyà te teliwazà te menge etew he meǥinged diyà te senge nenasyun.
4 Su kenà egkesukud is gaǥew nu wey kebmetinumanen nu.
5 He Megbevayà, ipeehè nu is kegkemekeǥeǥehem nu ziyà te langit wey kayi te tivuuk he kelibutan.
6 Libriya key pinaaǥi te ǥehem nu.
Tevaka nu is ked-ampù ku su para melibri key is menge minahal nu.
7 He Megbevayà, migkaǥi ka ziyà te valey nu te,
“Ebpekezaag a; ebehinen ku is Shekem wey is Suǥud he Sucot, ne ibpemeǥey ku heini te menge etew ku.
8 Kediey is Gilead wey is Manase.
Is Efraim iyan pengalang ku te menge etew ku
ne is Juda iyan ibpezumala ku kandan.
9 Is Moab suluǥuen ku, ne ǥaked ku is Edom.
Igkulahì ku is kegkezeeǥa ku te Filistia.”
10 He Megbevayà, hentei is ed-uwit kedì diyà te Edom wey ziyà te inged kayi he neliǥuy te verengbeng?
11 Kenè be iyan ka, is Megbevayà he mid-iniyug kenami ne wazè en meduma te menge sundaru zey?
12 Tevangi key te ked-asdang te menge kuntada zey,
su kenà ebpulus is tavang te etew.
13 Ebpekezaag key pinaaǥi te tavang nu, He Megbevayà,
su edaaǥen nu is menge kuntada zey.