111
Kedalig te Megbevayà
1 Deliǥa is Nengazen! Ebpeselematan ku is Nengazen te ebpuun kayi te tivuuk he ǥehinawa ku ziyà te ketiǥuman te menge metazeng.
2 Mekeǥeǥehem is menge vaal te Nengazen;
egngunngunuen heini is langun te menge egkesuat kayi.
3 Mekeǥeǥehem wey zekelà is dengeg te menge vaal te Megbevayà,
ne is kegkemetazeng din ebpedayun te wazà pidtemanan.
4 Ne ibpetentenuzan din kenitew is egkein-inuwan he menge vaal zin.
Meupiya sikandin wey hihizuwen;
5 ebeǥayan din te keenen is edtahud kandin,
ne layun din edtentenuzi is kebpekid-uyun din.
6 Impeehè din te menge etew zin ke sengemenu is kegkemekeǥeǥehem te menge vaal zin,
pinaaǥi te kebeǥaya zin diyà te kandan te menge tanà te menge etew te zuma he menge nasyun.
7 Egketuusan is ketazeng din wey kebmetinumanen din diyà te langun he menge vaal zin,
ne egkeseriǥan is langun he menge suǥù din.
8 Ne heini is menge suǥù din ebpedayun te wazà pidtemanan,
ne nezumahan te kebmetinumanen wey ketazeng is kebeǥaya zin kayi.
9 Midlibri zin is menge etew zin,
ne midhimu zin is kebpekid-uyun kandan te wazà pidtemanan.
Waǥas sikandin wey egkein-inuwan.
10 Emun egkesuat is etew he mebmetau, kinahanglan he edtahud sikandin te Nengazen.
Is langun he edtuman te menge suǥù din ne zuen dan hustu he kedsavut.
Ereg sikandin he edeliǥen te wazà pidtemanan.