112
Utew Zeyzey is Etew he Edtahud te Nengazen
Deliǥa is Nengazen!
Utew zeyzey is etew he edtahud te Nengazen,
wey igkelipey zin is kedtuman te menge suǥù din.
Ebmeuswaǥen is menge anak din,
su is kevuwazan te menge etew he edtinazeng edtuvazan te Megbevayà.
Edsepian is pemilya zin,
ne kenà egkelipatan is keupiya zin taman te taman.
Minsan merusirem duen gihapun kerayag para te menge etew he hustu is paaǥi zan te kebpengungubpaan, kelelaǥan, hihizuwen, wey metazeng.
Edtuvazan is etew he kelelaǥan, wey ibpesambey zin is duma, wey kenè din ibpeiseg is kegketiǥayun din pinaaǥi te limbung.
Kenà duwazuwa he ebmelig-en is kebpekesavuk din te minsan keenu.
Ne kenà sikandin egkelipatan te wazà pidtemanan.
Kenà sikandin egkahandek te mezaat he menge tudtul,
su melig-en is kedsarig din te Nengazen.
Kenà sikandin egkeǥiyaǥiya wey egkahandek,
su netuenan din he ziyà te huziyan he timpu egkeehè din is kegkezaaǥa te menge kuntada zin.
Kelelaǥan sikandin diyà te menge pubri;
is keupiya zin egketenuzan taman te taman
ne ebeǥayan sikandin te Megbevayà te zengeg pinaaǥi te ked-umani te Megbevayà te egkehimu zin.
10 Egkaahà heini te menge lalung ne egkekeǥetket is menge ngipen dan te kegkepauk dan,
ne henduen be sikandan te egkereney tenged te kegkeeled dan.
Kenà edlampus is menge pelanu zan.