21
Is Kedeliǥa te Nengazen tenged te Kebpekezaag
1 Nengazen, mibmelipayen is hadì he pinilì nu,
tenged te mibeǥayan nu sikandin te zesen.
Utew sikandin nelipey su mibpengelinteuwan nu he mekezaag sikandin.
2 Imbeǥey nu kandin is penganduy zin;
imbeǥey nu kandin is ebuyuen din.
3 Midawat nu sikandin ne mibeǥayan nu te meupiya he menge vutang.
Migkurunahan nu sikandin te lunsey he vulawan.
4 Mibuyù din diyà te kenikew he sumpuli nu is untung din,
ne mibeǥayan nu sikandin te meluǥayad he untung.
5 Tenged te kezeeǥan he imbeǥey nu ziyà te kandin
nevantug sikandin wey midekelà is dengeg din.
6 Ne ebpedayun is menge tuvad nu kandin.
Ne utew nekeveǥey kandin te kelipey is kebpekiduma nu kandin,
7 su edsarig man sikandin kenikew te Nengazen he iyan kes Utew Lavew he Megbevayà.
Ne tenged te kebmahala nu kandin, ne kenà sikandin egkemenu.
8 Is gehem nu ne iyan ebpekezaag te langun he menge kuntada nu.
9 Emun ebpeehè ke en kandan, edezeetan nu sikandan,
ne egkeiring sikandan te rapug he utew meregreg.
Ne tenged te pauk nu kandan, ed-epuren nu sikandan te hapuy.
10 Edhimetayan nu is langun he kevuwazan dan,
ne wazà edresik kandan.
11 Mezaat is pelanu zan kenikew,
piru kenè dan edlampus.
12 Su ebpelaǥuy sikandan emun egkeehè dan he andam ke en te kedsilut kandan, he iring te ziyè nu en ibpesinaru te kandan is edhingaten nu he panà.
13 Nengazen, ereg ka he edeliǥen tenged te zesen nu.
Umbe, egkanta key te idalig kenikew tenged te kegkemekeǥeǥehem nu.