22
Edtevangan te Megbevayà is menge Egkengerasey
1 Megbevayè ku, Megbevayè ku, maan is mibey-anan a kenikew?
Maan is meziyù ka kayi te kedì?
Nezumahan en te zag-es is ked-antus ku, piru wazè e pa ǥihapun kenikew tevangi.
2 Megbevayè ku, wazè ku en himeley su maandew wey mezukilem is kebpengumew-umew ku kenikew,
iyan, wazà a kenikew tevaka.
3 Iyan waǥas ka, ne edeliǥen ka te menge tig-Israel su iyan ka hadì dan.
4 Midsarig kenikew is menge kepuun dey ne midlibri nu sikandan.
5 Mignganey ke zan ne midtevangan nu sikandan.
Midsarig sikandan kenikew ne wazà sikandan mepakyas.
6 Ebpeel-elezan a wey edsudien a te menge etew,
ke sikandan te, “Wazè din pulus; kenà sikandin iring te etew, kekenà, iring sikandin te tagkey.”
7 Is kada sevaha he ebpekaahà kedì ne ed-insultu kedì,
ne ebpengelengkeleng is egkaǥi te,
8 “Midsarig ke man buwa te Nengazen, ne maan is wazè ke zin libriya?
Ke tutuu he nekepenunuat ka kandin, ne maan is wazè ke zin tevangi?”
9 Piru iyan ka mibpeǥawas kedì puun te ǥetek te iney ku,
ne puun pa te edsusu e pa, ne inlikey a kenikew te ebpekezezaat kedì.
10 Ne puun te kedlusaza kedì ne insarig e en diyà te kenikew, ne iyan ke zà Megbevayè ku.
11 Umbe, kenà a kenikew vey-ani su meǥaan en egkeula-ula is melised
ne wazà duma he ebpeketavang kedì.
12 Edliǥuyan a te menge kuntada ku,
iring sikandan te memezesen he tudu he vaka ziyà te tanà he Bashan.
13 Iring daan sikandan te menge erimaung he ebpemenhiniǥer is eginganga he andam en he edaas kedì.
14 Naawè en is desen ku; iring a te wahig he id-ulà,
ne henduen be te nekegkikiwey en is menge tulan ku.
Naawè en daan is kevurut ku; iring a te netunew he kendilà.
15 Naawè en is desen ku; iring a te tanà he mibadtik,
ne mibmevisekeg en is dilè ku.
Nengazen, ebey-anan a kenikew minsan pa te edserupatey ad.
16 Midliǥuyan a te lalung he menge etew; iring sikandan te menge asu he ebpemen-erungut kayi te kedì.
Mibpelehusan dan is menge belad ku wey menge paa ku.
17 Nenletew en is menge tulan ku; ne is menge etew, ne edtengtengan e zan dà.
18 Mibahinbahin dan is menge visti ku pinaaǥi te ripa.
19 Piru, sikew, Nengazen, kenà a kenikew pekeziyui.
Iyan ka ebpekeveǥey kedì te zesen ne tevangi ad guntaan.
20 Libriya a su edhimetayan a te menge kuntada ku;
kenè nu ituǥut he mepatey a kayì te henduen be te menge asu.
21 Libriya a su egkeizen a te iring te menge erimaung.
Tevaka nu is ampù ku ne libriya a su egkeizen a te iring te menge tudu he vaka.
22 Idsangyew ku ziyà te menge emurè ku te inged is mibpemeelan nu.
Edeliǥen ku sikew ziyà te menge kevurunan dan.
23 Sikiyu is edtahud te Nengazen, deliǥa niw sikandin!
Sikiyu is menge etew kayì te Israel he menge kevuwazan ni Jacob, bentuǥa niw wey kehendeki niw is Nengazen!
24 Su wazè din pesegdana is menge elentusen te menge egkaayuayu.
Wazè din sikandan iniyuǥi, kekenà, ebpemineǥen din is kebuyù dan te tavang.
25 Midasig a kenikew su wey a medalig kenikew diyà te kevurunan te menge etew nu.
Diyà te etuvangan te menge etew he edtahud kenikew, edtumanen ku is menge pesarig ku he ibpemuhat ku ziyà te kenikew.
26 Egkaan is menge egkaayuayu ne egkahantey sikandan.
Is menge etew he midangep diyà te kenikew ne edalig kenikew.
Berakat he mebmeupiya wey mebmeluǥayad is untung dan.
27 Egketenuzan ka te langun he menge etew
ziyà te minsan hendei kayi te tivuuk he kelibutan
ne edlikù dan diyà te kenikew,
Nengazen, ne ed-ezapen ke zan,
28 Su iyan ka hadì, ne iyan ka edumala te menge nasyun.
29 Kenà duwazuwa he edsimba kenikew is langun he menge sepian he etew kayi te kelibutan.
Minsan is langun he menge etew he henduen be te ebpematey en, ne ibpeehè dan is kedtahud dan kenikew su edluhud dan.
Wey minsan sikan is nemematey en,
30 ebpenilbi kenikew is menge kevuwazan dan.
Ebpenuruen mehitenged kenikew te Nengazen
is huziyan he menge lapis te menge kevuwazan.
31 Ne sikan is huziyan he egkengeetew, edtudtulan daan sikandan he midlibri nu is menge etew nu.
Ne iyan ka mibaal kayi.