23
Is Nengazen Iring te Ed-elima te menge Kerehidu
1 Nengazen, iyan ka ed-elima kedì,
umbe egkekuwa ku is langun he egkinehenglanen ku.
2 Iring a te kerehidu he ibpehimeley nu ziyà te penebtavà he zutun is gerabi he memeilem he sagbet.
Ne ibpeikul a kenikew ziyà te meleneng he wahig.
3 Edlig-enan a kenikew.
Ibpeikul a kenikew te hustu he zalan te ketazeng su wey ka meveǥayi te zengeg.
4 Minsan pa ke edhipanew a ziyà te suǥud he zuen duen ebpekepatey,
ne kenà a egkahandek su zuma ku man sikew.
Ebpekeveǥey kedì te kelig-en wey kelipey is kegiyahi nu wey kebpengelangi nu kedì.
5 Ed-endaman a kenikew te keenen diyà te etuvangan te menge kuntada ku.
Impurung a kenikew itetepian su midlenahan nu is ulu ku.
Ne ebpepezaharan a kenikew te inumen.
6 Nesiguru ku he ke sengemenu keluǥayad is untung ku
ne iyan daan keluǥayad te kebpurungi nu wey kebmahala nu kedì.
Ne ziyà a ed-ubpa te valey nu, Nengazen, te wazà pidtemanan.