28
Ampù para te Kebuyù te Tavang te Megbevayà
1 Nengazen he iyan kutè ku.
Ebpengumew a kenikew.
Pemineǥa nu is ked-ampù ku!
Su emun kenà a kenikew ebpemineǥen, ne megaan a ebpatey.
2 Pemineǥa nu is hangyù ku te tavang diyà te kenikew,
zutun te ziyà a medsinaru te segradu he valey nu he imbayew ku is menge velad ku.
3 Kenà a siluti zuma te menge lalung.
Uvag dà sikandan ebpekid-emiǥu su mezaat is pelanu zan.
4 Belesi nu sikandan te sungkad te menge vaal zan.
Siluti nu sikandan tenged te mezaat he menge vaal zan.
5 Su wazè dan seǥipaa is menge mibeelan nu.
Umbe zezeeti nu sikandan ne veleǥaza nu en sikandan dutun te kebpekesavuk dan.
6 Nengazen, ereg ka he edeliǥen,
su midineg nu is kebpehizuhizu ku kenikew.
7 Iyan ka mibeǥey kedì te zesen; iyan ka migkelasag kedì.
Midsarig a kenikew ne edtevangan a kenikew.
Umbe utew a melipayen ne migkanta a te peselamat diyà te kenikew.
8 Iyan ka, Nengazen, mibeǥey te zesen diyà te menge etew nu.
Iyan ka melig-en he eputà wey menluluwas te pinilì nu.
9 Libriya nu wey tuvazi nu is menge etew he ǥaked nu.
Bentayi nu sikandan he iring te ed-elima te kerehidu;
etimana nu sikandan te wazà pidtemanan.