29
Is Mekeǥeǥehem he Laǥeng te Nengazen
Sikiyu is menge linimbag diyà te langit,
deliǥa niw is Nengazen.
Deliǥa niw is gehem din wey zesen din.
Deliǥa niw is kegkemekeǥeǥehem din.
Ezapa niw sikandin diyà te segradu he etuvangan din.
 
Ebpenriǥungriǥung is laǥeng te Nengazen he iyan kes mekeǥeǥehem he Megbevayà,
ne egkezineg heini ziyà te menge zaǥat.
Is laǥeng te Nengazen, mekeǥeǥehem wey zekelà is dengeg din
ne ebpekevadtì te melig-en he kayu ziyà te Lebanon.
Edhuyungen te Nengazen is menge vuntud diyà te Lebanon wey Hermon,
ne egkeiring heini te nati he vaka he edlinglingketew.
Is laǥeng te Nengazen, ebpekepekilat
wey ebpekehuyung te sibsivayan;
egkehuyung din minsan is sibsivayan diyà te Kadesh.
Is laǥeng te Nengazen, ebpekepaanak te selazeng
wey ebpekepetaktak te zahun te menge kayu.
Ne ziyà te valey zin ibensag te langun is lalag he, “Mekeǥeǥehem is Megbevayà!”
 
10 Is Nengazen iyan ebmandù te zalem te menge wahig;
iyan sikandin kes hadì he ebmandù te wazà pidtemanan.
11 Edlig-enan te Nengazen is menge etew zin,
ne ebeǥayan din sikandan te meupiya he kebpekesavuk.