30
Ked-ampù te Kebpeselamat
1 Edeliǥen ku sikew, Nengazen,
su midlibri a kenikew te kezeetan
ne wazè nu ituǥut he mekezayandayan is menge kuntada ku tenged te kebpekesavuk ku.
2 Nengazen he Megbevayè ku,
mibpetavang a kenikew tenged te zaru ku,
ne mibewian a kenikew.
3 Midlibri a kenikew te kemetayen.
Wazà nu ituǥut he mepatey a.
4 Sikiyu is metinumanen he menge etew te Nengazen,
deliǥa niw is Nengazen pinaaǥi te kegkanta niw.
Deliǥa niw sikandin te kedalig pinaaǥi te kedtentenuzi niw te kegkewaǥas din.
5 Su melemu egkaawà is pauk din,
iyan, is keupiya zin mulà, ebpedayun te wazà pidtemanan.
Egkeseeng ki emun timpu te mezukilem,
piru egkelipey ki zed emun ebmeselem en.
6-7 Nengazen, tenged te keupiya nu in-iring a kenikew te vuntud su midlig-enan a kenikew.
Ne tenged te melig-en is kebpekesavuk ku,
ne ziyà te ǥehinawa ku ebpekekaǥi a te, “Kenà ad iyan egkemenu.”
Piru hein wazà a kenikew seǥipaa, neǥezam ku is kegkahandek.
8 Nengumew-umew a kenikew, Nengazen, ne midhangyù a.
Ke siak te,
9 “Hengkey is egkekuwa nu emun ebpatey a?
Su kenè en man ebpekezalig kenikew is minatey en.
Ne kenè din en daan igkeseysey is kebmetinumanen nu.
10 Pemineǥa a kenikew, Nengazen, ne kehizuwi a.
Ne tevangi a.”
11 Tenged te tavang nu, mid-ilisan nu te melipayen he kedsayew is keseengan ku.
Impeluwas nu kedì is bisti ku he saku he tuus te kedlalew ku,
ne mibeǥayan a kenikew te kelipey.
12 Umbe, kenà a ebpereremek dà, kekenà, egkanta a te menge kedalig kenikew.
Nengazen he Megbevayè ku, ebpeselamatan ku sikew te wazà pidtemanan.