34
Is Keupiya te Megbevayà
1 Layun ku edeliǥa is Nengazen;
kenà a ed-engked he edalig kandin.
2 Ibpegalbu ku is Nengazen,
ne sikiyu is menge edèdaaǥen, pemineg kew wey medlipey.
3 Duma kew kedì te edalig te Nengazen;
edsevaha kiw te kedalig kandin.
4 Mid-ampù a ziyà te Nengazen ne midtavak e zin.
In-awè din is langun he kegkehandek ku.
5 Ebmelipayen is menge etew he edsarig diyà te kandin,
ne kenè dan en egkepeel-elezan.
6 Mibpengumew is egkaayuayu he etew te Nengazen, ne midtavak din sikandin.
Midlibri zin sikandin te langun he kelised din.
7 Ebentayan te velinsuǥuen te Nengazen is menge etew he edtahud te Nengazen,
ne edlibriyen din sikandan te kezeetan.
8 Gezami niw wey niw metueni ke sengemenu keupiya is Nengazen.
Utew zeyzey is etew he midsarig te pengalang te Nengazen kandin.
9 Sikiyu is metinumanen he menge etew te Nengazen, tehuza niw sikandin.
Su is menge edtahud kandin, egkekuwa zan is langun he kinahanglan dan.
10 Is menge erimaung egkehimu he egkaamin is keenen dan ne egkengevitil zan,
iyan, is menge etew mulà he edangep diyà te Nengazen, kenà egkeeminan te meupiya he menge vutang.
11 Hendini kew is egkengesuat he mebmetau, pemineǥa a keniyu.
Ebpenuruen ku sikiyu te kedtahud te Nengazen.
12 Egkesuat kew ve he mekaangken te kelipey wey melugayad he untung?
13 Likayi niw is kegkaǥi te mezaat wey kedtarùtarù.
14 Likayi niw is mezaat he vaal, ne iyan niw veeli is meupiya.
Himuwa niw is paaǥi para layun melinew is kebpekidepitè niw te zuma.
15 Ebentayan te Nengazen is menge metazeng,
ne ebpemineǥen din is menge pengemuyù dan.
16 Piru egkuntedahan din is menge etew he ebaal te mezaat.
Edèdeetan din sikandan taman te kenè en sikandan egketenuzan te menge etew kayi te kelibutan.
17 Ebuyù te tavang diyà te kandin is menge metazeng,
ne edtevangan din sikandan.
Edlibriyen din sikandan te langun he menge kemereǥenen dan.
18 Uvey is Nengazen diyà te nengepakyas,
ne edlibriyen din is menge etew he naawà is perateng dan.
19 Minsan mahabet is menge mereǥen he egkehitavù diyà te etew he metazeng,
iyan, edlibriyen sikandin te Nengazen te langun dutun.
20 Kenà duwazuwa is ked-ipata te Nengazen kandin,
ne wazà minsan sevaha he tulan din he egkelepù.
21 Is menge mezaat he vaal, ne iyan ebpekepatey te menge mezaat he etew.
Edsilutan te Nengazen sikan is egkeepesan dan is menge metazeng.
22 Edlibriyen te Nengazen is menge etew zin he menge suluǥuen din.
Ne is langun he ed-aput diyà te kandin ne kenè din edsilutan.