35
Ampù para te Kebuyù te Tavang te Megbevayà
Kuntedaha nu, Nengazen, is menge etew he mibpekigkuntada kedì.
Pekidtebek ka te menge etew he mibpekidtebek kedì.
Kuwaa nu is kelasag nu wey penagang nu, ne tevangi a.
Endama nu is dezeisey wey dezekelà he vangkew nu wey pemilaka nu is menge etew he edal-as kedì,
ne peseriǥi a he edlibriyen a kenikew.
Deyzey ke egkepeel-elezan is menge etew he edtinguhà he edhimatey kedì.
Berakat he mekepelaǥuy he egkengeteranta is menge etew he mibpelanu he edezaat kedì.
Deyzey ke egkeiring sikandan te ukap he idlayap te keramag dutun te kedsegseǥa kandan te velinsuǥuen nu.
Berakat he ebmerusirem wey ebmelandeg is egkepeveyaan dan dutun te kedel-asa kandan te velinsuǥuen nu.
 
Su minsan wazà hustu he hinungdan, mibaal zan te litag he idlitag dan kedì,
wey mibangbang dan su para meulug a zutun.
Berakat he metik-awi sikandan meumahi te kezeetan.
Berakat he iyan sikandan meuney zuen te idlitag dan kedì.
Berakat he iyan sikandan meulug duen te vangbang dan.
Ne zutun egkelipey a tenged te kedlibriya nu kedì, Nengazen.
10 Ne zutun, ibensag ku is menge lalag he ebpuun diyà te tivuuk te ked-etew ku he edhenduen te,
“Wazè nu iyan iring, Nengazen.
Edlibriyen nu is menge egkaayuayu wey menge pubri te kedluplupiǥa wey kebintahai kandan.”
 
11 Is mesipala he menge etew ebpenistiǥus kuntra kedì.
Ed-uluǥan a zan te kewsa.
12 Mezaat is ibales dan te meupiya he ebeelan ku ziyà te kandan,
umbe neselekawan a utew.
13 Piru emun egkezeruwan dan, ebpetuusan ku he igkeseeng ku sikandan pinaaǥi te kebivisti ku te saku wey kebpuasa.
Ne emun kenà edtevaken is ampù ku para kandan,
14 epekeriǥuriǥu a is edlalew
he iring te suled ku wey emiǥu ku is igkeseeng ku.
Nekezuzungul a is egkeseeng
su is kegkeseeng ku kandan iring daan te kegkeseeng te sevaha he etew te iney zin.
15 Iyan, hein iyan ad midlised, mid-amur-amur zan is egkengelipey.
Mid-amur-amur zan is edezaat kedì.
Ne wazè ku metueni ke maan.
Ne edsiguduwan e zan en ed-ituka.
16 Duma zan is memesudì he wazà medtuu te Megbevayà
su utew zekelà is pauk dan kedì.
17 Nengazen, kenè nu ipedayun is kenè nu kedtavangi kedì.
Libriya ad te ked-etekiya kedì kayi te iring te menge erimaung.
18 Ne zutun te kedlibriya nu kedì, edeliǥen ku sikew wey ebpeselamatan diyà te ketiǥuman te menge etew nu.
19 Kenè nu ituǥut he melipey is limbungan he menge kuntada ku tenged te kegkezeeǥa zan kedì.
Is ebpemendumut kedì te wazà hustu he hinungdan,
kenè nu ituǥut he meengiti e zan.
20 Wazà menge lalag dan he meupiya he ebpekepeupiya te zuma he etew,
kekenà, ebaalvaal sikandan te mezaat he tudtul
su wey megurigew sikan is melinawen en is ked-ubpè dan kayì he lugar.
21 Imbensag dan kayi te kediey is pesangil zan, he ke sikandan te,
“Neehè dey is mezaat he mibeelan nu.”
22  Nengazen, neehè nu heeyan, umbe kenè ka và dà redtan.
Kenà a kenikew pekeziyui.
23 Nengazen he Megbevayè ku,
levani e en kenikew kayi te menge etew he mibpesangil kedì.
24  Nengazen he Megbevayè ku, ǥeina te kenè ka ebpemintahà, ne ipetueni nu te menge etew he wazè ku salà.
Kenè nu ituǥut he ed-eengitan e zan.
25 Kenè nu ituǥut he mekekaǥi sikandan te,
“Netuman en human is penganduy zey te kedezaat kandin!”
 
26 Is langun he iyan igkelipey zan is menge kebpekaantus ku, berakat he egkepeel-elezan wey egkeliveg sikandan.
Berakat he sikan is langun he neminusan kediey, kenà medlampus is tuyù dan wey mepeel-elezi sikandan.
27 Berakat he mekeugyab te kegkelipey is menge etew he igkelipey zan is kenà ked-utengi kedì te salà he impesangil kedì.
Berakat he layun sikandan mekekaǥi te, “Utew zait he edeliǥen is Nengazen ne igkelipey zin is keupiyaanan te suluǥuen din.”
28 Edtudtulen ku is ketazeng nu,
wey layun ku sikew edeliǥa.