36
Is Kezaat te Etew wey Keupiya te Megbevayà
1 Iyan heini lalag he taǥù kayi te ǥehinawa ku
mehitenged te kegkemekesesalà te lalung he etew:
Is lalung he etew ne kenà egkahandek te Megbevayà.
2 Su metikang is ked-isipa zin te keugelingen din,
kenè din egkaahà is kelelalung din he ereg pezem he egkeepesan din.
3 Mezaat wey tarù is menge lalag din,
ne kenè din en ed-ul-ulahan is hustu wey meupiya.
4 Minsan edhidhizeǥà sikandin ne ebpelanu sikandin te mezaat.
Dekelà is gehinawa zin te kebaal te kenà meupiya,
ne kenè din id-awà diyà te isip din is kebaal te mezaat.
5 Nengazen, is gaǥew nu wey kegkemetinumanen, ne kenà egkesukud;
metikang pa heini te langit.
6 Is ketazeng nu, ne melig-en; igkepetug-iring te metikang he menge vuntud.
Is hustu he kedhukum nu, ne kenà egketegkad; igkepetug-iring te mezalem he zaǥat su kenà egketegkad.
Ed-eturen nu, Nengazen, is menge etew wey menge langgam.
7 Megbevayè ku, utew mahal is gaǥew nu.
Ebpengelangan nu is menge etew iring te kedlekupi te tagbis te pispis din.
8 Nengeperahan sikandan te idsegkayà he keenen diyà te valey nu;
ipeinum nu sikandan te metaam he wahig nu.
9 Su iyan ka ebpuunan te untung.
Edteyawan key kenikew, ne neteyawan is menge isip dey.
10 Ipedayun nu is kebmahala nu te menge etew he migkilala kenikew.
Ipedayun nu is kebaal nu te meupiya ziyà te menge etew he midtinazeng.
11 Kenè nu ituǥut he mezaag a te menge lalung wey menge gelbuwen he kuntada ku.
12 Egkezeetan is lalung he menge etew,
ne kenè en sikandan ebpekeenew.