57
Ampù para te Kebuyù te Tavang te Megbevayà
1 Kehizuwi a, Megbevayè ku, su ziyà a te kenikew med-aput,
iring a te pispis te tagbis he ebpelekup te iney zin.
Ed-aput a ziyà te kenikew taman te wazè en bangkit.
2 Ed-umew a ziyà te kenikew te Utew Lavew he Megbevayà,
iyan ka edtuman te mibpeleyaǥan nu kediey.
3 Puun te langit ebpekeuma is tavang nu te kedlibri kediey.
Ebpeel-elezan nu is menge etew he edsurung kediey.
Ibpeehè nu is gaǥew nu wey kebmetinumanen nu para kediey.
4 Edliǥuyan a te menge kuntada ku he iring te menge erimaung he andam he edawi te etew.
Is menge ngipen dan iyan is menge vangkew wey menge vesut te panà.
Is menge zilè dan iyan is meǥarang he menge ispada.
5 Ipeehè nu, Megbevayè ku, is kegkemekeǥeǥehem nu ziyà te langit wey kayi te tivuuk he kelibutan.
6 Neseeng a su edlitaǥen a te menge kuntada ku.
Ne mibangbang daan sikandan te para egkeuluǥan ku,
piru iyan sikandan neulug duen.
7 Edsarig a ziyà te kenikew Megbevayè ku.
Egkanta a te kanta he idalig kenikew.
8 Ed-enew a emun egkeriwaswas en, ne ed-endamen ku is gehinawa ku wey is menge gelemiten ku te kedtukar he zuen menge kuwirdas su para egkeǥamit ku te kedalig kenikew.
9 Edeliǥen ku sikew, Nengazen, diyà te teliwazà te menge etew.
Egkentahan ku sikew ziyà te teliwazà te keet-etawan diyà te senge nenasyun.
10 Su is gaǥew nu wey kebmetinumanen nu ne kenà egkesukud;
metikang pa heini te langit.
11 Ipeehè nu Nengazen is kegkemekeǥeǥehem nu ziyà te langit wey kayi te tivuuk he kelibutan.