58
Egkezeetan is menge Lalung
1 Sikiyu is menge pengulu, metazeng be is kedhukum niw te menge etew?
2 Kenà! Su iyan niw zà ed-isipen is kebaal te mezaat.
Ebpelebleviyan niw is menge etew ziyà te inged niw.
3 Is menge lalung, ebpekeziyuan dan is Megbevayà ne edtarùtarù dan puun pa te kegkeetew zan.
4-5 Mevisa sikandan iring te menge uled.
Iring sikandan te zurepu he kenà ebpemineg te laǥeng te metau he ebmansu te uled.
6 He Nengazen he Megbevayà, iawè nu is kebpekegaga zan te kebpendezaat he iring te edsepù ka te ngipen te menge erimaung.
7 Mahanew pezem sikandan iring te wahig he egkemezahan,
ne emun ebpanà sikandan, ne kenè dan pezem mekeigù.
8 Meiring pezem sikandan te tuwey he egkaapug,
etawa vatà he neranran he wazè en mekevulug mekaahà te merayag.
9 Dezeeti nu sikandan, batà etawa meǥurang. Dezeeti sikandan he meǥaan pa te ed-initen he ziniyun he edtevunan te menge zezeisey he kayu.
10 Egkelipey is menge metazeng emun egkeehè dan he edsilutan nu is menge lalung ne ebpematey sikandan.
11 Dutun ebpekekaǥi is menge etew te,
“Tutuu iyan he zuen suhul te menge metazeng;
ne zuen Megbevayà he edhukum te menge etew kayi te kelibutan.”