72
Ampù para te Hadì
1 He Megbevayà, penurua nu is hadì te kenikew he paaǥi te kedhukum he metazeng,
2 para egkezumahan te ketazeng is kedhukumi zin te menge etew nu lavew en is egkengaayu-ayu.
3 Berakat he ebpekeveǥey te keuswagan te menge etew nu is menge vuntud wey menge vuvungan tenged te ketazeng te hadì.
4 Berakat he edlevanan wey edtevangan te hadì is menge egkaayuayu,
ne edaaǥen din is menge etew he edaagdaag kandan.
5 Berakat he ebpedayun is kedhadì din te wazà pidtemanan pinaaǥi te kegkehimu he hadì te menge kevuwazan din, mintras duen pa andew wey vulan.
6 Berakat he egkeiring sikandin te uzan he ebpekeveǥey te wahig kayi te kelibutan.
7 Dutun te timpu te kedhadì din, berakat he kenà egkaawà is ketazeng
ne kenà egkaawà is kegkemeuswaǥen te ked-ubpà te menge etew taman te taman.
8 Berakat he is ginhedian din ebpuun te sevaha he zaǥat ne taman en te sevaha pa he zaǥat,
wey puun te Wahig he Eufrates ne taman te kinemeziyuan he vahin te kelibutan.
9 Berakat he mebpesakup kandin is menge kuntada zin he ziyà ebpemen-ubpà te sibsivayan.
10 Berakat he is menge hadì diyà te Tarshish, menge pulu, wey te Sheba, ebeǥey ziyà te kandin te menge ǥasa te kebpekilala he ebpesakup sikandan kandin.
11 Berakat he ebpesakup kandin is langun he menge hadì
ne ebpenilbi kandin is langun he menge nasyun.
12 Su edtevangan din is pinesagdan he menge egkaayuayu, he ebuyù te tavang diyà te kandin.
13 Egkehizuwan din is menge wazà egkehimu wey egkengaayuayu,
ne edtevangan din su wey kenà sikandan ebpatey.
14 Edlibriyen din sikandan te kedèdaaǥa wey kebpesipelahi kandan,
su utew mevali sikandan diyà te kandin.
15 Berakat he luǥeyazi te untung is hadì!
Berakat he ebeǥey kandin te vulawan is Sheba.
Berakat he layun sikandin id-ampù he tuvazi sikandin te Megbevayà.
16 Berakat he mebeǥey te menge abut is tanà minsan is puntur te menge vuntud,
ne meiring te Lebanon he utew uuzaran.
Berakat he mebmahabet is ebpemen-ubpà diyà te menge inged,
meiring sikandan kezakel te menge sagbet diyà te menge vevesukà.
17 Berakat he kenà egkelipatan is ngazan te hadì te taman te taman mintras duen pa andew.
Berakat he pinaaǥi kandin edtuvazan is langun he menge nasyun,
ne ebpekekaǥi is menge etew ziyà te menge nasyun te, “Deyzey sikandin.”
18 Mezait he edeliǥen is Nengazen he Megbevayà, kes Megbevayà te Israel, he iyan dà ebpekehimu keniyan he menge egkengein-inuwan.
19 Ereg he edeliǥen is kegkemekeǥeǥehem din te wazà pidtemanan.
Berakat he maahà te menge etew kayi te tivuuk he kelibutan is kegkemekeǥeǥehem din.
Amen! Amen!
20 Iyan heini ketepusan he menge kebpengemuyù ni David te anak ni Jesse.