73
Is Metazeng he Kedhukum te Megbevayà
Meupiya iyan is Megbevayà te Israel,
lavew en diyà te menge etew he lumpiyu is gehinawa zan.
Piru siak, hapit en egkaawà is kedtuu ku,
su nesina a te gelbuwen wey lalung he menge etew hein neehè ku he mid-uswag sikandan.
Meupiya is kedlelawa zan ne kenà mesakit is kemetayen dan.
Wazà menge elentusen dan ne kenà sikandan edlised iring te zuma he menge etew.
Umbe, melemu zà diyà te kandan is kebpaahà te kegkegelbuwen dan wey kegkemesipala zan.
Is menge ǥehinawa zan nepenù en te kelelalung,
ne iyan dan dà layun egkeisip is kebaal te mezaat.
Edsudien dan wey mezaat is ebpengeǥiyen dan diyà te zuma.
Utew sikandan hembugiru he ebpenhulgà wey ebpendaagdaag te zuma.
Mezaat is menge lalag dan he igkuntada zan te Megbevayà diyà te langit wey te menge etew kayi te kelibutan.
10 Umbe, minsan is menge etew te Megbevayà edsunud kandan wey ebpengumbenar te egkeǥiyen dan.
11 Ke sikandan te, “Kenà egkesayud is Megbevayà?
Wazà hanew te Utew Lavew he Megbevayà.”
 
12 Iring keniyan is menge lalung he etew,
wazè dan igkeliveǥ ne mid-iseg pa is kegkesepian dan.
13 Tenged kayi wazè ku maahà is pulus te kedtinazeng ku wey kedlikey ku te salà.
14 Layun a kenikew ibpaantus, Megbevayè ku;
hapit kada meselem is kedsiluti nu kedì.
15 Angin ke mid-iringan ku is lalung he menge etew te ked-un-undaha zan kenikew,
ne nelimbungan ku en is menge etew nu.
16 Nenigudu a wey ku mesavut heini,
piru utew a midlised,
17 taman te midhendiyà a te valey nu,
ne zutun nesavut ku human ke hengkey is egkehitavù diyà te lalung he menge etew.
18 Benar he idsavuk nu sikandan diyà te wazà kesiguruwan he kebpekesavuk,
ne edezeetan nu sikandan.
19 Egketik-ew zà sikandan egkengezeeti;
egkeumahan sikandan te mekahandekhandek he hitavù ne ebpematey sikandan is langun.
20 Is kegkahanew zan iring te teǥeinep he emun edkepukew ki is nekelipezeng ne wazè en.
Egkelipatan en sikandan emun egkesilutan nu en sikandan.
 
21 Hein neseeng a wey nesekitan a,
22 nehimu a he iring te tulebung he langgam diyà te etuvangan nu su wazè ku sikew mesavut.
23 Piru ed-uvey a ǥihapun diyà te kenikew ne egiyahan a kenikew.
24 Egiyahan a kenikew pinaaǥi te menge sambag nu,
ne ziyà te egkehuziyanan ed-uwiten a kenikew ziyà te utew meupiya he kebpekesavuk.
25 Wazè en duma ziyà te langit he egkinehenglanen ku, kekenà, iyan ke zà.
Su ǥeina te kayi ka te kediey, wazè en duma pa he ebpengenduyen ku kayi te kelibutan.
26 Minsan edluyahan is lawa ku wey isip ku,
iyan ka, Megbevayè ku, ebpuunan te zesen ku.
Iyan ke zà egkinehenglanen ku taman te taman.
27 Is menge etew he ed-iniyug kenikew, ne kenà duwazuwa he egkengahanew sikandan;
edezeetan nu is wazà medtuman te egkesuatan nu.
28 Piru mid-isip ku mulà he utew meupiya is ked-uvey ziyà te kenikew, Megbevayà.
Nengazen he MEGBEVAYÀ, midhimu ku sikew he kutè ku,
su wey ku ikeseysey is langun he menge vaal nu.