74
Ampù para te Nasyun dutun te Timpu te Kelised
He Megbevayà, maan is ebpedayun en is ked-iniyuǥi nu kenami?
Maan is nepeukan key kenikew is menge etew he ebentayan nu?
He Megbevayà, tentenuzi nu is menge etew nu he mibpilì nu zengan para mehimu he kenikew ne midlibri nu para maangken nu en.
Tentenuzi nu is Buvungan he Zion he ubpeey nu.
Leuya nu ne ahaa nu is ebpedayun he kegkezeeti zuen te valey nu tenged te mibeelan te menge kuntada.
Nen-ugyab dutun te valey nu is menge kuntada nu, su ibpeehè dan is kegkezeeǥa zan kenami te menge etew nu.
Midsavuk dan te bendira zan he tuus te kebpekezaag dan.
Midrundus dan is baley nu he henduen dan te egkamet diyà te ketelunan.
Midèdeetan dan sikan is mibpurungan ukiri he menge kayu he himan te valey nu pinaaǥi te menge wasey wey menge piku zan.
Mibinsulan dan is baley nu;
midremerikan dan heini is ubpeey nu.
Iyan diyà te isip dan is ebpurungan key zan edezeeti.
Mibinsulan dan is langun he tiǥumà kayi te Israel he para te ked-ezapa kenikew.
Wazè en tuus te kebpekiduma nu kenami;
wazè en nesamà duen te ebpemeneuven nu,
ne wazè en netau kenami ke keenu egkeengked heini is pesipala kenami.
10 He Megbevayà, sengemenu keluǥayad is kebpeel-elezi te kuntada zey kenikew?
Taman en be te taman is ked-un-undaha zan kenikew?
11 Maan is wazè nu pa sikandan siluti?
Maan is henduen be te kenè nu edwelengen is menge velad nu?
Dèdeeti nu en sikandan!
12 Iyan ka, Megbevayà, hadì dey puun pa zengan,
ne kemahabet nu en libriya is menge etew kayi te kelibutan.*
13 Pinaaǥi te ǥehem nu neluwisan is tanà diyà te dizalem te zaǥat,
iyan ka migevà te menge ulu te zezekelà he menge langgam diyà te zaǥat.
14 Iyan ka migevà te menge ulu te menge dragun he Leviatan
wey mibpekaan te menge lawa zan te menge langgam diyà te sibsivayan.
15 Iyan ka mibpetudà te menge serebseb wey te menge wahig he edtudà.
Iyan ka mibpemazà te menge wahig he edtudà he kenà pezem egkemezahan.
16 Iyan ka mibaal te maandew wey mezukilem,
iyan ka midsavuk te andew wey vulan diyà te nesevukan dan.
17 Iyan ka midsavuk te langun he menge taltal kayi te kelibutan,
iyan ka midhimu te ǥulavung wey timpu te meǥenew.
18 Tentenuzi nu, Nengazen, is kebpeel-elezi wey kedsudia kenikew te menge tulebung he menge kuntada.
19 Kenè nu iveǥey is menge etew nu he iring te menge merepatik te menge kuntada he iring te kumekaan te etew he menge langgam.
Kenè nu lipati minsan keenu is edèdaaǥen he menge etew nu.
20 Tentenuzi nu is kebpekid-uyun nu kenami,
su utew mesipala is menge kuntada zey, ne mibmerusirem is nasyun dey tenged te kelelalung.
21 Kenè nu ituǥut is kegkepeel-elezi te menge edèdaaǥen.
Berakat he edeliǥen ka te menge egkaayuayu wey menge pubri.
22 He Megbevayà, levani nu en guntaan is dengeg nu.
Tentenuzi nu he edtulungan ke en ebpeel-elezi te menge tulebung.
23 Kenè nu ituǥut he ebpedayun is kedtulung kebpengulahì te menge kuntada nu he tuus te kegkepauk dan.
* 74:12 kelibutan: etawa, tanà te Israel.