75
Is Megbevayà iyan Menhuhukum
1 He Megbevayà, mepeselematen key kenikew.
Mepeselematen key su uvey ka kenami.
Edtudtulen dey is egkein-inuwan he menge vaal nu.
2 Ke sikew te, “Duen timpu he midtail ku he para te kedhukum,
ne metazeng is kedhukum ku.
3 Emun egkehuyung is kelibutan ne ebpengerkeren te kegkahandek is menge meǥinged kayi, ne iyan a edlig-en te mibengunan kayi.
4 Migkeǥiyan ku is menge hembugiru he menge lalung te med-engked en sikandan he ebpahambug wey ebpehivantug tenged te egkehimu zan.
5 Migkeǥiyan ku sikandan he engkezi zan en is kebpezalig dan.”
6 Hustu heeyan is egkaǥiyen te Megbevayà, su wazà duma he ebeǥey te zengeg,
7 kekenà, iyan dà is Megbevayà.
Iyan sikandin edhukum; ebpekevevaan din is ked-etew te zuma, ne is duma ebeǥayan din te zengeg.
8 Su egkulang is Nengazen te tasa he nepenù te eburàburà he utew mevisa he vinu he iyan is pauk din.
Ne edteǥayen din heini su wey meinum te langun he lalung he menge etew kayi te kelibutan taman te egkaamin dan.
9 Iyan, siak mulà, kenà a ed-engked he ebpenudtul mehitenged te Megbevayà ni Jacob,
ne egkentahan ku sikandin te menge idalig kandin.
10 Id-awè din is gehem te menge lalung he menge etew,
ne ed-umanan din mulà is gehem te menge metazeng.