76
Ebmezeeǥen is Megbevayà
1 Diyà te Juda nekilala utew is Megbevayà;
nevantug sikandin diyà te Israel.
2 Ed-ubpà sikandin diyà te Buvungan te Zion he ziyà te Jerusalem.
3 Dutun he lugar mibpendezeetan din is edhagyung he menge vesut te panà te menge kuntada, is menge kelasag dan, is menge ispada zan, wey is duma pa he menge ǥumaan dan.
4 He Megbevayà, mekeǥeǥehem ka wey utew lavew zutun te kedtupang nu puun te menge vuvungan he zutun nu penhimetayi is menge kuntada nu.
5 Mibpen-aǥew nu ziyà te mevurut he menge sundaru is menge vutang he inaǥew zan diyà te zuma.
Ne mibpematey sikandan is langun,
ne wazà minsan sevaha kandan he nekehimu he egkayew te velad din.
6 He Megbevayà ni Jacob, nemematey en is menge pereuntud te kudà wey is menge kudè dan pinaaǥi zà te kedawey nu.
7 Mekahahandek ka, Megbevayà.
Wazà ebpekehimu he edsukul kenikew emun egkepauk ka.
8 Ebpuun te langit imbeǥey nu is kukuman nu.
Ne nengahandek is menge etew kayi te kelibutan ne wazà sikandan mekekaǥi hein
9 midhukum ka, Megbevayà, he edlibriyen nu is langun he menge edèdaaǥen kayi te kelibutan.
10 Kenà duwazuwa he is kegkepauk nu te lalung he menge etew igkezeliǥi kenikew,
ne kemulu pa is pauk nu.
11 Pesarig kew ziyà te Nengazen he Megbevayè niw ne tumana niw heini.
Ipeuwit niw is menge meǥinged te kesikbit niw he menge nasyun te menge gasa ziyà te telehuzen he Megbevayà.
12 Ibpekevavè din is mepelevawen he menge pengulu;
igkehandek sikandin te menge hadì kayi te kelibutan.