79
Ampù para Kenà Meveyveyai is Nasyun
He Megbevayà, midsurung te meǥinged diyà te senge nenasyun is meǥinged diyà te tanà he ǥaked nu.
Midremerikan dan is segradu he valey nu ne midezeetan dan is Jerusalem.
Impekaan dan te zumezaas he menge tagbis wey zumezaas he menge langgam is nemematey he menge etew nu he menge metinumanen he suluǥuen nu.
Impetiǥis dan is lengesa te menge etew nu ne iring te wahig is kedtudà kayi ziyà te tivuuk he Jerusalem,
ne wazà minsan sevaha he nesamà he ebpekeleveng te nemematey.
 
Ebpeel-elezan key wey edsudien key te menge nasyun he nekeliǥuy kenami.
Keenu en buwa egkaawà, Nengazen, is pauk nu kenami?
Taman en be te taman is pauk nu kenami?
Eriyubriyub en be he iring te hapuy is kebpengelikud nu?
Ipeehè nu is pauk nu ziyà te menge nasyun wey menge ginhedian he wazà megkilala wey medsimba kenikew.
Su mibpenhimetayan dan is menge etew nu ne midezeetan dan is nasyun te menge etew nu.
Kenè key kenikew siluti tenged te menge salà te menge kepuun dey.
Kekenà, kenè nu en pekeuǥeta is kegkehizuwi nu kenami su wazè dey en egkehimu.
Tevangi key kenikew, Megbevayà he Menluluwas dey, su wey ka mezeliǥi.
Luwasa key wey peseyluwa key te menge salè dey su wey ka mevantug.
10 Kenè nu itugut he ebpekekaǥi ziyà te kenami is menge etew ziyà te zuma he menge nasyun te, “Hendei en is Megbevayè niw?”
Ipeehè nu kenami is penimales nu te menge nasyun tenged te kebpenhimetayi zan te menge etew nu he menge suluǥuen nu.
 
11 Pemineǥa nu is dag-es te menge etew nu he menge vihag.
Edhimetayan sikandan, umbe libriya nu sikandan pinaaǥi te ǥehem nu.
12 Nengazen, kepipitu nu tekepa is penimales nu te uvey zey he menge nasyun te kebpeel-elezi zan kenikew.
13 Ne sikami is menge etew nu he iring te menge kerehidu he ebentayan nu, ne wazà pidtemanan te kebpeselemati zey kenikew.
Layun dey sikew edeliǥa taman te taman.