80
Ampù para te Kebuyù te Tavang te Megbevayà
1 Sikew is ebantey te Israel, pemineǥa key kenikew,
iyan ka migiya te iring te menge kerehidu he menge kevuwazan ni Jose.
Sikew is ebpimpinuu ziyà te pinuuwè nu te kedhadì he egkezivavew te nepelestaran te menge kirubin, ipeehè nu is gehem nu
2 ziyà te etuvangan te tribu ni Efraim, ni Benjamin, wey ni Manase.
Ipeehè nu en is gehem nu, ne veyai key ne ibriya key.
3 He Megbevayà, iliku nu kayi te kenami is keupiya te kebpekesavuk dey zengan.
Ipeehè nu kenami is hizu nu su wey key melibri.
4 Nengazen he Megbevayà he Mekeǥeǥehem,
sengemenu keluǥayad is timpu he igkeepes nu zà is menge kebpengemuyù dey te menge etew nu?
5 Mibpenù key kenikew te seeng ne samè dà kenè dey meinum is luhè dey.
6 Intuǥut nu he tebeka key te kesikbit dey he menge nasyun,
ne sikandan is menge kuntada zey ne ed-undaunda kenami.
7 He Megbevayà he Mekeǥeǥehem, ilikù nu kayi te kenami is meupiya he kebpekesavuk dey zengan.
Ipeehè nu kenami is keupiya nu su wey key melibri.
8 Sikami is menge etew nu, neiring key te pinemula he paras he migkuwa nu ziyà te Ehipto ne impemula nu ziyà te tanà te menge etew he midsegseg nu.
9 Mibpurungan nu hiǥewani haazà is tanà, ne nendalid haazà is paras ne neeneb te langkat din heini is tanà.
10 Nelembungan te menge subpang din is menge vuntud wey is dezekelà he kayu he sidru.
11 Nekeuma is menge subpang din diyà te Daǥat he Mediteraneo ne taman en te zekelà he Wahig he Eufrates.
12 He Megbevayà, maan is midrundus nu is menge verengbeng kayi te paras?
Egketakew en hinuun te langun he sumeseǥazà is menge veǥas din.
13 Egkeenen heini te kenà ayam he menge vavuy wey zuma pa he menge leew he langgam.
14 Seǥipaa key zed umani, Megbevayà he Mekeǥeǥehem!
Puun diyan te langit ahaa nu is kebpekesavuk dey.
Is-isipa key kenikew is menge etew nu,
15 he iring te pinemula he paras he impemula nu pinaaǥi te ǥehem nu.
Tentenuzi key kenikew is menge anak nu he impehitindeg nu su para mevantug ka.
16 He Megbevayà, iring key te midtamped he paras he mibinsulan.
Egkezumahan te pauk nu is kedtengtengi nu kenami ne midezeetan key kenikew.
17 Piru ǥuntaan tevangi key en kenikew is menge etew he mibpilì nu he ebpekeuvey kenikew wey midlig-enan nu su para mevantug ka,
18 ne kenè dey en sikew ed-ewaan.
Ilikù nu zini te kenami is meupiya he kebpekesavuk dey,
ne ed-ezapen dey sikew.
19 He Nengazen he Mekeǥeǥehem he Megbevayà,
ilikù nu zini te kenami is meupiya he kebpekesavuk dey!
Ipeehè nu kenami is hizu nu su wey key melibri.