92
Kanta te Kedalig
1 Nengazen he Utew Lavew he Megbevayà, meupiya is kebpeselemati kenikew wey is kegkanta te menge idalig kenikew.
2 Maandew wey mezukilem meupiya is kebpeheyaǥa te ǥaǥew nu,
3 he ebpezumahan te kedtukari te menge instrumintu he zuen dan menge kuwirdas.
4 Su midlipey a kenikew, Nengazen, pinaaǥi te egkein-inuwan he menge vaal nu.
Tenged te mibpemeelan nu, egkanta a te kegkelipey ku.
5 Utew egkein-inuwi is mibpemeelan nu, Nengazen!
Kenè dey egketegkad is isip nu.
6 Kenà egkesavut te menge tulebung wey menge taleng
7 he minsan iring te nenuvù he menge sagbet is ked-uswag te kebpekesavuk te menge lalung, edezeetan gihapun sikandan te wazà pidtemanan.
8 Piru sikew, Nengazen, lavew ka te langun te wazè din pidtemanan.
9 Kenà duwazuwa he ebpekedsusuwey is lalung he menge kuntada nu ne ebpemematey sikandan.
10 Mibeǥayan a kenikew te zesen he iring te zesen te tudu he vaka,
wey mibeǥayan a kenikew te kelipey.
11 Nezineg ku wey neehè ku mismu is kepildiyan te lalung he menge kuntada ku.
12 Is ked-uswag te menge metazeng igkepetug iring te meveǥas he palma,
ne is kebpekesavuk dan igkepetug iring te kayu he sidru ziyà te Lebanon he midtuvù he melig-en.
13 Iring sikandan te menge kayu he impemula ziyà te valey te Nengazen he Megbevayè tew he meupiya is tuvù dan,
14 he ebpemeǥas gihapun minsan meǥurang en,
ne kemulu ǥihapun meilem wey melig-en.
15 Ne puriba heini he metazeng is Nengazen he iyan endilungè ku;
wazà minsan hengkey he mezaat diyà te kandin.