93
Hadì Tew is Megbevayà
1 Hadì ka, Nengazen;
is bisti nu iyan is kegkemekeǥeǥehem nu wey is utew nu kegkelavew.
Utew melig-en is kebenguna nu te kelibutan ne kenà heini egkehuyung.
2 Is kedhadì nu puun pa te puunà,
su zaan ke en hein wazè pa is kelibutan.
3 Utew mezaǥing is daǥat, Nengazen,
ne edreǥuuk is menge vaǥel.
4 Piru sikew is Nengazen he ziyà te langit, lavew ke pa he mekeǥeǥehem te kezaǥing te zaǥat;
lavew ke pa he mekeǥeǥehem te menge vaǥel kayi.
5 Nengazen, egkeseriǥan utew is menge suǥù nu,
wey is kegkesegradu te baley nu te wazà pidtemanan.