97
Lavew is Megbevayà te Langun he menge Pengulu
1 Edhadì is Nengazen!
Umbe ereg he edlipey is kelibutan, ragkes en is menge isla.
2 Nekeliǥuy kandin is mekepal he ǥapun,
ne egkezumahan te ketazeng wey hustu he kukuman is kedhadì din.
3 Duen hapuy ziyà te egkehunaan din ne iyan haazà ebpekeepur te menge kuntada zin diyà te peliǥuy.
4 Is kilat din neketayew te kelibutan.
Ne hein naahà heini te menge etew ne mibpengerker sikandan te kegkahandek.
5 Nengetunew is menge vuvungan he henduen be te kendilà diyà te etuvangan te Nengazen, is Nengazen iyan ebayàbayà te tivuuk he kelibutan.
6 Impahayag te langit he metazeng sikandin,
ne naahà te langun he menge etew is kegkemekeǥeǥehem din.
7 Egkepeel-elezan is langun he edsimba te ledawan wey is ibpegalbu zan is duma he menge ed-ezapen.
Is langun he tarù he megbevayà edluhud te ked-azap te tutuu he Megbevayà.
8 Nengazen, nezineg te menge meǥinged te Jerusalem wey te zuma pa he menge inged diyà te Juda he edsilutan nu is menge kuntada zan,
umbe nengelipey sikandan.
9 Iyan ka, Nengazen, Utew Lavew he Megbevayà, he ebayàbayà kayi te tivuuk he kelibutan.
Utew ka lavew te langun he mid-isip te menge etew he menge megbevayè dan.
10 Is menge etew he mibmahal zan is Nengazen ne kinahanglan he igkeepes dan is mezaat.
Su edtipiǥan te Nengazen is untung te metinumanen he menge etew zin.
Ne kenà ebpekezezaat kandan is menge lalung su edlibriyen din sikandan.
11 Is keupiya te Megbevayà ne iring te andew he edsilà diyà te menge metazeng
ne ebpekeveǥey heini te kelipey kandan.
12 Sikiyu is menge metazeng, lipey kew tenged te mibeelan te Nengazen diyà te keniyu.
Tentenuzi niw is kegkewaǥas din pinaaǥi te kedeliǥa niw kandin.