98
Deliǥa is Megbevayà he Meghuhukum
1 Egkentahan tew is Nengazen te veǥu he kanta,
su egkein-inuwan is menge vaal zin!
Pinaaǥi te kandin he keugelingen he ǥehem wey zesen, midaag din is menge kuntada tew.
2 Impaahà te Nengazen diyà te menge nasyun he midtevangan kiw zin ne mibpengelinteuwan din he mekezaag kiw.
3 Wazè din melipati is insaad din he ebmahalen kiw zin wey ebpekid-uunungen sikandin kenitew te menge tig-Israel.
Naahà te langun he menge etew ziyà te minsan hendei he vahin kayi te kelibutan ke mibmenumenu te Megbevayè tew is kedhimuwa zin he mekezaag kiw.
4 Sikiyu is menge etew kayi te tivuuk he kelibutan, ugyab kew para te Nengazen tenged te kegkelipey niw.
Kanta kew he melipayen te kedalig kandin.
5-6 Kanta kew te menge kentahan he idalig te Nengazen he eduyuǥan te menge alpa, menge trumpita, wey menge vudyung.
Ne ugyab kew te kegkelipey ziyà te etuvangan te Nengazen he Hadì tew.
7 Medlipey is kelibutan wey is langun he ed-ubpà kayi,
ragkes en is daǥat wey is langun he netaǥù kayi.
8 Henduen be te menge etew is menge wahig he ebpelakpak,
ne ebperedredseey te kegkanta te kegkelipey is menge vuvungan.
9 Egkelipey zan diyà te etuvangan te Nengazen su edhendini sikandin te kedhukum te menge etew kayi te kelibutan.
Metazeng is kedhukumi zin kandan wey wazà bintahà.