18
Is menge Kezeeǥan ni David
(2 Samuel 8:1-18)
1 Hein huziyan he timpu nezaag ni David is menge Filistihanen, ne nesakup din en sikandan. Naaǥew zin diyà te kandan is Gat wey is menge lugar he nemekelingut kayi.
2 Nezaag daan ni David is menge Moabitanhen, wey midsakup din sikandan ne ebayad dan te vuhis diyà te kandin.
3 Nekidtebek daan si David ki Hadì Hadadezer he hadì te Zoba he uvey te Hamat, su si Hadadezer, edsekupen din pezem is tanà he uvey te Wahig he Eufrates.
4 Naaǥew eni David is 1,000 he menge kerwahi zan, 7,000 he ebpemen-untud te kerwahi wey 20,000 he menge sundaru. Mibpemiangan eni David haazà is menge kudà he eguyud te kerwahi gawas te 100 he insamè din su egemiten din.
5 Hein nemekeuma is menge tig-Aram he ziyà ebpuun te Damascus su edtavang ki Hadadezer, mibpenhimetayan eni David is 22,000 kandan.
6 Mibpevaal si David te menge kampu ziyà te Damascus, he lugar te menge Aramihanen. Ne nehimu en he nesakup din sikandan, ne ebayad dan te vuhis diyà te kandin. Impezaag si David te Nengazen, minsan hendei sikandin ebpevayà is ebpekidtebek.
7 Migkuwa ni David is menge vulawan he menge kelasag te menge upisyal ni Hadadezer, ne mid-uwit din diyà te Jerusalem.
8 Migkuwa zin daan is mezakel he menge brunsi ziyà te Teba wey Cun, he menge sakup te inged ni Hadadezer. Heini he menge brunsi, ne migamit ni Solomon ne mibpeveelan din he teleǥuey te wahig he henduen be te kawà he egngezanan te Daǥat, wey menge tukud, wey menge gelemiten he brunsi he para egemiten duen te valey te Nengazen.
9 Ne netuenan heini ni Hadì Tou he hadì te Hamat he nezaag ni David is langun he sundaru ni Hadì Hadadezer he hadì te Zoba.
10 Umbe, impehendiyè din is anak din he si Hadoram te ki Hadì David te kebpengemusta kandin wey kebeǥey kandin te zengeg tenged te kezeeǥan din ki Hadadezer te kebpekidtebek. (Heini si Tou wey si Hadadezer ne neuǥet en he telekuntada.) Mid-uwit si Hadoram te menge azen he vulawan, pelata, wey brunsi he igasa zin.
11 Inhalad heini ni Hadì David diyà te Nengazen, iring ded te mid-ulaula zin te nengaaǥew zin he menge pelata, menge vulawan, diyà te zuma he menge nasyun he nengezaag din he iyan is: Edom, Moab, Ammon, Filistia wey Amalek.
12 Si Abishai he anak ni Zeruya nekepatey te 18,000 he menge Edomanhen diyà te menge suǥud he egngezanan te Timus.
13 Mibpevaal si David te menge kampu ziyà te Edom, ne nehimu he menge sakup din is langun he menge Edomanhen. Impezaag te Nengazen si David minsan hendei sikandin ebpevayà is ebpekidtebek.
Is menge Upisyal ni David
14 Nehimu he hadì si David te tivuuk he Israel, ne mibeelan din is metazeng wey hustu para te langun he menge etew zin.
15 Ne iyan pengulu te menge sundaru zin, si Joab he anak ni Zeruya. Ne iyan midseriǥan te menge libru te ginhedian din si Jehoshafat he anak ni Ahilud.
16 Is lavew he menge memumuhat ne iyan si Zadok he anak ni Ahitub wey si Ahimelec he anak ni Abiatar. Ne iyan sikritaryu si Shavsha.
17 Is pengulu te tigbantey ki David he menge Kiritnen wey menge Pilitnen, iyan si Benaya he anak ni Jehoyada. Ne is menge anak ni David he menge maama, iyan upisyal zin.